Rijna: Bonaire lo mantene frontera cu Aruba habri toch

KRALENDIJK – Bonaire no ta cera su frontera pa Aruba mas entrante diabierna awor 10 di juli. Asina gezaghebber di e isla Edison Rijna a confirma pa noticiacla.com. “Si, Aruba ta keda den bubbel pa nos hendenan” e mandatario a cuminsa na bisa. E decision ey a cay diaranson despues di un reunion di evaluacion. Mientras cu no ta cera e frontera, ‘lo monitor (Aruba) hopi di aserca’. E mandatario tabatin bon palabra tambe pa e forma con Aruba ta anda cu e crisis. “Aruba mes ta hasi hopi pa evita ku e virus ta yega via di Merca. Tin bon palabracion cu boso DVG”, Rijna a sigui bisa. 

CERA FRONTERA

Algun siman pasa ainda Rijna a bisa cu ta cera frontera cu Aruba asina cu esaki habri su frontera pa Merca. Esaki a causa poco consternacion na Aruba (y Bonaire) pasobra tabatin e miedo di biaha e ora, cu chens cu bo por a keda pega na un di e islanan, despues di 10 di juli (mayan). Esaki no ta e caso mas. Di otro banda, no ta descarta cu si e situacion escala y Aruba bira mucho infecta, cu Bonaire por tuma e decision di cera su frontera ainda. 

CONDICIONAN DI BONAIRE

Bonaire a presenta su condicionan diaranson riba e situacion di biahe. Aki e mandatario ta anuncia cu a dicidi cu ta mantene e maneho di entrada, unda cu tambe ta sigui cu e regla cu mester yena un declaracion di salud pa tur pasahero cu yega e isla, no obstante e aeropuerto di salida. Mientras cu Bonaire no por exigi (obliga) e pasahero pa tuma un PCR Test 72 ora prome cu e biaha pa e isla, ta haci un apelacion riba e sentido di responsabilidad di e biahero, na bienestar di su salud propio y esun di Bonaire. Ademas, pasaheronan cu te cu 14 dia prome cu a biaha pa Bonaire, a permanece na un pais di riesgo halto, no por biaha pa e isla. Si nan dicidi di biaha toch, nan entrada lo wordo prohibi a base di ley vigente di entrada di islanan BES. Por lesa e reglanan completo AKI.