Wever: Retiro di 1500 ambtenaar no ta un di e exigencianan di Hulanda

ORANJESTAD – E informacion cu ta circula pa retira 1500 ambtenaar, no ta parti di e medidanan cu Hulanda kier impone riba Aruba. Asina prome minister Evelyn Wever a bisa durante e reunion cu stakeholders diaranson mainta, unda cu a contesta preocupacion y pregunta di stakeholdernan. E mandatario di otro banda, a confirma si cu e otro dos puntonan, esta aumenta edad di pensioen te 67 aña y cambia e sistema di impuesto na BTW di 12.5%, si ta parti di e exigencianan di Hulanda. Segun Wever, e pensioen mester a cambia caba aki 4 aña te 65, pues tabata trahando riba esey. Y pa loke ta impuesto, esey tabata un trayecto cu mester di tempo pa introduci (a menciona entre 12 pa 18 luna di tempo), y cu esaki ta canando. Pues ta puntonan cu no ta nobo. Pa loke ta esun di retira 1500 ambtenaar, mientras cu e no ta riba e lista, di otro forma si ta referi na algo asina, manera reduccion di gasto di personal. Pero no asina directo cu ta haci mencion di retira 1500 ambtenaar. Di otro banda, e ta un deseo si di Hulanda pa bay den e direccion ey.