Lidernan politico di Aruba no ta sostene forma di proceder di Hulanda

ORANJESTAD – Durante un cumbre di algo mas di 2 ora, tur partido politico invita, a mustra nan sosten na prome minister Evelyn Wever contra e posicion cu Hulanda a tuma contra Aruba. Cu esaki, prome minister a haya sosten cu e tabatin mester pa por enfrenta Hulanda diabierna proximo. Segun e mandatario, e la keda contento cu e sosten, y a bisa cu esaki ta haci su decision mas facil pa formula e pensamento di Aruba contra e situacion cu a surgi. Cada partido (MEP, AVP, RED, UPP, POR, RAIZ) cu a presenta (CURPA no a bin), a haya chens amplio pa vocifera nan preocupacion independientemente, pero na final a duna palabra di sosten na Wever Croes contra e forma cu Hulanda ta actuando. Partido AVP a manda su representante Robert Candelaria debi cu e lider Mike Eman pa motibo personal, no por a presenta. Esaki no obstante cu e contenido di e pakete di documento no ta conoci ainda pa ningun hende, pero esey no tabata necesario. A mustra cu tur partido ta riba un liña. A remarca si cu tabata COVID-19 cu a percura pa logra algo asina. Prome minister Wever a priminti di mantene e partidonan presente informa, y lo continua cu e dialogo asina den e proximo dianan nos dilanti. E presentacion cu e partidonan a haya, tabata mescos cu esun di mainta durante e reunion cu tur stakeholders, unda cu aki tambe, tanto e director di DWJZ George Croes como director di Directie Financien Derrick Werleman, a duna nan respectivo presentacion.