Daniel Ferrara: Nos orguyo Rubiano no ta paga nos coriente!

ORANJESTAD – “Nos ta compronde Aruba su dolor den e parti di autonomia, pero lastimosamente, nos orguyo Rubiano no ta paga nos coriente, no ta paga nos awa, y no ta pone cuminda riba mesa”. Asina e representante pa Aruba Food & Beverage Association, conocido chef y propietario di Giannis Group, Daniel Ferrara, a pinta un situacion basta fuerte di sector publico pa e forma cu el a keda afecta pa e crisis di COVID-19. Tabata durante e session di informacion cu stakeholdernan diaranson mainta, cu Ferrara a expresa su mes asina durante e session di haci pregunta, splicando gobierno asina pakico mester acepta e condicion di Hulanda diabierna di RFT pa nos por sigui haya e fiansa necesario pa por sigui opera na Aruba. 

REPRESENTACION

Segun Ferrara nan ta representa como 6000 trahado den e sector di Horeca menciona, y mayoria ta negoshi priva. A mustra cu for di e 200 negoshinan den e ramo aki cu tin e 6 mil trahadonan, si nan perde e subsidio cu gobierno ta duna, e luna aki, ‘practicamente nos economia local ta desparece den un luna. “Aruba lo keda den man di stranheronan, doñonan di hotel stranhero, y companianan stranhero”, Ferrara, a sigui bisa. E mes ta di tata stranhero (Italia) y e y su mama ta naci na Aruba. 

ENCUESTA

Ferrara a referi na e encuestanan cu tabata andando (entre nan di noticiacla.com) riba e tema, unda cu mayoria ta contesta cu nan ta aceptando e condicionan cu Hulanda, sin sa of compronde kico nan ta. “Pueblo ta cansa”, Ferrara a bisa. E ta mustra cu Hulanda por tin su historia cu Aruba, refiriendo na e parti colonial, pero cu e realidad ta cu Reino ta pone cuminda riba mesa. “Ta Reino ta dicta” Ferrara a sigui bisa. “Mr President, nos kier aclara algo. Nos no ta para den solidaridad. Nos di sector priva a bay atras cu 90%. Esey ta cu subsidio. Nos a perde nos trabou caba. Nos ta perdiendo nos negoshinan caba. Algun di nos a muri caba” e comerciante a sigui bisa. “Y no acepta esaki y purba tapa e solo cu un dede, ta actua di mala fe” Ferrara a finalisa bisando.