Encuesta: Mayoria kier pa Aruba acepta ley di reino sin mas,di Hulanda pa fia placa

ORANJESTAD – Mayoria di esnan cu a participa riba na e encuesta di NoticiaCla riba Facebook, a scohe pa Aruba acepta e ley di Reino manera cu Hulanda a present’e aworaki pa fia placa. Esey ta 56% di e 2800 personanan cu a participa na e encuesta. E grupo cu a bisa no, tabata menos (44%) di e cantidad di participantenan. E encuesta riba Facebook tabata duna solamente dos opcion, esta un si of no y a keda haci pa 24 ora. 

FALTA INFORMACION

Algun a comenta y bisa cu nan no ta participa pasobra nan no tin tur informacion, mirando cu e informacion pa participa na e RFT, e Rijkswet, ta confidencial ‘ainda’. Como tal nan no por comenta riba algo cu no ta conoci ainda. Asina mes tin 2.800 (di e 24.000 usuario di Facebook di noticiacla) cu ta yega e cantidad minimo (10%) pa e ta representativo. Asina mes, noticiacla ta mustra cu esaki ta solamente un encuesta entre esnan cu tin acceso na internet, Facebook y cu posiblemente ta ‘parti’ di e grupo di usuario di pagina di Facebook di noticiacla. 

MAS ENCUESTA TA PRO PA HULANDA

A nota cu tin mas encuesta ta tumando lugar den varios otro plataforma di noticia tanto na Aruba como Corsou. Y interesante ta cu fuera di e portal aki, por lo menos tres portal mas di noticia (24ora.com), Amigoe di Aruba, y  Extra (di Corsou) tambe a saca e grupo cu kier pa acepta e ley di Hulanda, como mas grandi. 

PUEBLO DESCONECTA DI POLITICA

E interpretacion di hopi riba e tema ta mustra cu e resultadonan ta mustra claramente cu pueblo ta ‘desconecta’ di politica y ta cansa di e situacion y simplemente kier un cambio. Nan ta cansa di e bay bin entre politica, y simplemente kier pa bin cambio y pesey ta opta pa Hulanda cay aden. Hopi ta bisa cu nan no tin confiansa mas den politiconan di pasado y awor. Y cu ta sinti cu a bira tempo pa Hulanda cay aden y tuma control. Esaki no necesariamente kier men cu nan kier ‘colonisacion’ manera cu politiconan ta plantea e situacion, sino cu nan ta wak e den un forma diferente.