Politiconan di Aruba kier acceso na condicionan di Hulanda pa tuma decision

ORANJESTAD – Mayoria di e lidernan di fraccion di Parlamento di Aruba tin problema pa formula un opinion riba e condicionan cu Hulanda a impone riba Aruba e siman aki, pa nos por haya e siguiente fiansa. Algo logico mirando cu tanten cu no tin aceso na e contenido, no por papia riba dje, te pa duna comentario. Asina noticiacla.com a compronde di nan diamars. 

BISA NADA

Cu excepcion di lider di fraccion di MEP Rocco Tjon, tur otro a confirma cu nan no por bisa nada, tanteno cu nan no wak e documento. Prome minister Evelyn Wever mientrastanto a manda pidi colega minister Rutte pa e por haya e libertad pa por comparti e informacion. 

REACCION POR

Segun lider di fraccion di partido POR Dellanire Maduro, su partido “ no por duna un standpunt riba e condicionnan, mirando cu nos no conoce e condicionnan ni detayenan” Maduro a cuminsa na bisa. “ Cada condicion mester por wordo studia, dialoga y negosha pa asina por bisa si ta pro of contra riba cada un di e condicionnan. Locual si nos como fraccion di POR ta contra ta e hecho cu Hulanda no ta comparti e documento cu e condicionnan cu parlamento di Aruba y kier pa nos acepta esaki sin mas. Cual ta haci imposibel pa eherce nos funcion como parlamento y ta contra nos derecho fundamental” Maduro a finalisa bisando. 

REACCION RED

Lider di fraccion di RED, Ricardo Croes tambe a mustra cu e no por comenta.”Nos no a haya (e) documentacion.(Total di)  218 pagina y nos no a wak nada” Croes a cuminsa na bisa. “Ta imposibel pa bai di acuerdo blind!” e lider di fraccion a sigui bisa. “ Ami no ta interesa den acept condicionnan di Hulanda. Na e mesun momento pa traha den acuerdo cu normasnan di bon gobernacion nos mester haya e documentonan pa satisface transparencia” e la finalisa bisando.

REACCION AVP

Fraccion di AVP tabata hopi corto pa e portal aki. “ Ainda nos no a haña detayes y Gobierno su mes aparentemente no a fiha un posicion” e lider di fraccion Marlon Sneek a bisa e portal aki. “No por dicidi si no a haña documento” Sneek a sigui bisa como unico comentario. 

REACCION DAPHNE LEJUEZ

Parlamentario independiente Daphne Lejuez mescos cu tur otro lider di fraccion a bisa tambe cu ta dificil pa comenta tanten cu nan no a wak e documentacion. 

MEP

E portal aki no a logra haya contacto cu Rocco Tjon, lider di fraccion di MEP, pero ta conoci cu Tjon tabata basta vocal riba e tema y cu e lo bringa Hulanda riba e asunto aki internacionalmente.