Rhuggenaath: No ta entrega nos pais pa un saco di placa

Rhuggenaath: No ta entrega nos pais pa un saco di placa

Posted on 07/7/2020 12:20 pm AST | Updated on 07/7/2020 12:22 pm AST

WILLEMSTAD – Gobierno di Corsou no ta bay di acuerdo cu e condicion stipula dialuna ultimo, pa e por haya e siguiente ‘saco di placa’ di Hulanda. Asina prome minister di Corsou Eugene Rhuggenaath a declara durante un conferencia di prensa  diamars mainta. “Nos no por bay di acuerdo cu un plan cu a wordo impone riba nos” Rhuggenaath a bisa. “Nos no ta entrega nos pais pa un saco di placa” Rhuggenaath a sigui bisa. E tempo cu a duna Corsou (4 dia) pa yega na un decision, sin consulta cu gremionan y Parlamento, simplemente no ta posibel y democratico, segun e prome mandatario. Esaki ta nifica tambe en corto, cu si Corsou no bay di acuerdo, cu e no ta haya e ‘saco di placa’ cu e mester pa por sigui maneha e crisis di COVID-19. Lo tin cu bay haci esaki riba propio forza y wak con ta bay dilanti. 

HULANDA NO TA DUNA PLACA

Rhuggenaath a mustra tambe cu Hulanda a informa tambe cu diabierna awor no tin un decision ainda pa honra of aproba e sosten di likides pa Corsou, pasobra cu no por a constata ainda cu Corsou a cumpli cu tur e exigencianan mara na e tweede tranche di placa. “Pero cu nos bay di acuerdo cu tur e condicionan mara na e di tres tranche pa e siguiente tres lunanan, e ora RMR ta haya un mandato pa na momento cu Corsou cumpli, mas tarda 15 di juli 2020, e ora ey RMR lo aproba e siguiente tranch di financiamento. E condicionan mara na esaki ta cu Corsou mester bay di acuerdo cu un asina yama Rijkswet Hervormings Entiteit, pa Caribe, y esaki ta nifica cu Corsou mester bay di acuerdo cu un ley cu ta aplicabel pa tres paisnan Aruba, Corsou y St Maarten, como gobierno, sin a consulta di e.o. RvA, Parlamento y esey pa Corsou no ta cuadra cu un proceso democratico. ‘Y como tal mi por bisa cu pa diabierna awor, no ta posibel pa nos ‘stem in’ cu e condicion aki” Rhuggenaath a bisa. 

KICO TA PASA SI CORSOU ACEPTA

Si Corsou acepta cu Hulanda su plan di maneho, ta mara no solamente e gobierno aki pero tambe esnan di futuro te cu 2027, tuma un decision empugna cu nos leynan local y Statuut, y sigur e proceso democratico. Si no ‘stem in’, esey ta nifica cu lo no tin un siguiente tranche di financiamento y cu esey ta nifica cu Corsou riba propio forza lo tin cu maneha su situacion e ora. 

  • Powered by SETAR