- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
Geert Rep a bira presidente di Rotary Club Aruba pa 2020–21
ORANJESTAD - Diasabra siman pasa Rotary Club Aruba a instala su directiva nobo pa 2020–21. Presidente saliente América Barrios a hiba un discurso pa asina duna un relato di su aña. Na final un aña sigur diferente door di e pandemia di covid-19 cu a afecta nos isla. América ta sumamente orguyuso di e miembronan cu a sa di yuda na unda cu por pa asina Rotary Club Aruba por a duna su aporte y sosten na e fundacion nan cu awor mas cu nunca mester ayudo.
Durante e anochi di instalacion, América a hasi entrega tambe di reconocimento na un paar di miembro di Rotary Club Aruba cu a destaca durante e aña. E miembronan aki a ricibi un “Paul Harris” pin como aprecio. E miembro nan ta Shelby Maduro y Don de Veer cu a ricibi e pin di “Paul Harris, sapphire”. Alex Nieuwmeyer, kende a ricibi un condecoracion siman pasa di “Ridder in de Orde van Oranje-Nassau”, a ricibi tambe un “Paul Harris, double sapphire” pin, pa su trabao y esfuerso pa nos comunidad durante e añanan.
E anochi a sigui cu instalacion di e directiva nobo bao di guia di Geert Rep, kende a wordo apunta como e siguiente presidente di Rotary Club Aruba pa aña 2020 – 2021. Geert ta miembro di Rotary Club Aruba desde 2011. E otro miembronan di directiva a keda como lo siguiente: Milton van Brussel (secretaria), Diego Acevedo (tesorero), América Barrios (presidente saliente), Frederick Nuboer (vice presidente), Sanju Luidens-Daryanani (relacionista publico), Rubiela Lampe-Chiquito (miembrecia), Ferdinand Rahusen (projectonan), Robert Curtis (Fundacion Rotary International) y Norman Henriquez (sergeant at arms).
President Geert a hiba palabra gradiciendo América y e directiva saliente pa e bon trabao. Durante su presentacion Geert a enfoca ariba e tema di Rotary International pa e aña aki, cual ta “Rotary Opens Opportunities”. E tema aki tin un impacto mas grandi cu nos por pensa. Y cu den e tempo dificil aki nos como miembro mester ta flexibel y pensa diferente y yuda unda cu nos por.
E directiva e aña aki lo kier focus ariba un projecto di prevencion di obesidad den nos muchanan. A lanta un comite special pa esaki cual ta jama “Movement”. E comite aki lo tin e tarea pa plania y implementa e projecto aki den nos comunidad.
Por ultimo Geert a pone enfasis ariba e famia di Rotary na Aruba cu ta uno cu e crece e ultimo aña nan, nos tin un Rotaract Club cu 31 miembro, Interact Club na Schakel College cu 41 miembro y 9 miembro na e Interact Club nobo di Colegio Arubano. Hunto cu Rotary Club Aruba esaki ta un total di 136 miembro di e famia di Rotary aki na Aruba. Esaki ta significa cu hunto nos por hasi un impacto grandi y positivo den nos comunidad. Asina aki Rotary Club Aruba ta uni su mes na tema internationaciol, “Rotary Opens Opportunities”.
WEB Aruba ta firma acuerdo cu Seven Seas Water Group pa construi planta SWRO-3
ORANJESTAD – Diaranson dia 17 di mei ultimo, WEB Aruba y Seven Seas Water Group (SSWG), un proveedor multinacional di ‘Water-as-a-Service® (WaaS®) solutions’, a firma un acuerdo Build-Own-Operate-Transfer (BOOT) cu un termino di traspaso di 10 aña. Seven Seas Water (Aruba) VBA lo construi un planta di SeaWater Reverse Osmosis (“SWRO”) cual lo contribui cu un minimo di 16.500 meter cubico di awa potabel pa dia. E asina yama SWRO-3 lo ta parti di WEB Aruba su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. SSWG a haya e contrato despues di un proceso di tendering y negociacion na 2023. Lo construi e planta SWRO-3 riba tereno existente di WEB y ta planea pa cuminsa opera pa medio 2026.
Banco Central ta mantene e tasa di reserva obligatorio na 22,0 porciento
ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 26 di februari 2024, CMM a dicidi pa mantene e tasa di e reserva obligatorio na 22,0 porciento entrante 1 di maart 2024. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa mantene e tasa di reserva obligatorio ta basa primordialmente riba e reservanan oficial cu ta relativamente serca di e limite minimo di e ARA, apesar cu tanto e reservanan oficial como e reservanan internacional a keda adecua y ta premira pa permanece asina durante 2024. Adicionalmente, likides excesivo di e sector bancario ta mustra un tendencia ascendente durante e ultimo lunanan. Finalmente ta considera prudente di mantene e reserva obligatorio na su nivel actual, mirando crecemento continuo di credito y su efecto potencial riba reservanan internacional. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.
Schlipken: Aruba ta spera 18 mil turista Brasilero den 2024
SAO PAOLO – Aruba ta spera 18 mil turista Brasilero den 2024. Asina e director di turismo di ATA pa Latino Americano, Jordan Schlipken Croes a declara e siman aki na e portal PANROTAS, durante e evento WTM Latin America na Sao Paolo. Segun Croes, Brazil ta e di tres mercado Latino mas grandi pa Aruba, despues di Colombia y Argentina. Ta mustra cu na 2023 tabatin 14 mil bishitante di Brazil pa Aruba. Segun Croes, un di e motibonan di e cifranan grandi aki, ta e gastonan di e Brasileronan den e pais. Pa por yega e cifra di 18 mil Brasilero, Aruba tin 4 strategia principal pa e pais, fuera di e participacion na e bolsa di turismo Brasilero. Esaki ta e.o. incentivonan cu e operadornan y agente di biahe, ya cu 70% di Brasilero cu ta biaha pa Aruba ta cumpra nan pasashi via agentenan di biahe.
Aeroliña Mericano a reduci prijs di pasashi pa Aruba cu 50% e siman aki!
BOSTON – E aeroliña Mericano conoci pa tarifa reduci, JetBlue a reduci su tarifa mas ainda, cu 50% pa biahero pa e.o. Aruba. Nan ta yame un deal special di 2 dia ‘Hit Refresh’, unda cu dentro di e dos dianan aki, e biaheronan mester cumpra e pasashi. Por usa e biahe entre 7 di mei pa 12 di juni y no tin asina yama ‘blackout dates’ osea dianan cu bo no por biaha. Pa Aruba e prijs a wordo reduci cu 50% di p.e $776 dollar te na $378 round trip. No ta algo inusual y ta algo cu nan ta haci frecuente, pero ta sigui interesante. Tur e pasashinan tin cu origina for di Boston.
DEACI a otorga mas di 100 permiso pa negoshi nobo caba den 2024
ORANJESTAD - Pa cuminsa un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bou di responsabilidad di Minister di Asuntonan Economico.
Durante Seatrade 2024, islanan ABC a trata esfuersonan pa desaroyo regional
ORANJESTAD - E presencia di Aruba na Seatrade Cruise Global 2024, ta semper un paso significante pa fortifica colaboracion den e industria crucero y promove iniciativanan turistico cu e isla tin pa ofrece.
Follow NoticiaCla
