TjinAsjoe: Sistema di control lo evita cu un pasahero Mericano di hotzone por drenta Aruba sin mas

ORANJESTAD – Si un turista Mericano purba ‘burla’ di e sistema di biahe y trata na yega Aruba sin cu e ta cumpli cu e ‘reglanan di COVID-19’, tin mechanism na lugar cu lo frustra su intento. Asina CEO di Aruba Tourism Authority Ronella Tjin-Asjoe a sigura noticiacla.com dialuna anochi durante e press briefing. Segun e ehecutivo di turismo, mientras cu no por divulga tur proceso, tin dos punto di chekeo cu por controla e aspecto aki. No ta importa di unda e persona ta biaha, pasobra bo tin cu cumpli cu e rekisito di maneho di 100% testing na Aruba. “Sea cu ta eynan of aki nan. Pues bo no ta scapa di e parti di test tampoco” Tjin_Asjoe a sigura e portal aki. 

INTENTO DI BURLA

E situacion plantea pa e ehecutivo di turismo, pa e portal aki tabata cu si p.e. kico ta stroba un persona (Mericano) di move di un estado red zone, pa uno ‘normal’, y biaha for di e estado ey pa Aruba, siendo cu originalmente e no ta di e estado ey? Tin controlnan ‘in place’ pa frustra tipo di intentonan asina?

 Segun e ehecutivo, si e persona a logra burla di e sistema sin cu a capte p.e. na Merca, e chens ta minimo cu e por drenta Aruba toch. Esaki ta pasobra tin dos punto di chekeo den e sistema. Tur hende mester pasa den e maneho di chekeo na Aruba. Esaki kier men cu esun cu a logra burla for di Merca, lo wordo gara na Aruba ora cu e tin cu pasa su test obligatorio. 

FRONTERA HABRI

Diabierna awor Aruba ta habri su frontera pa Merca, pero cu yen di rekisito, pa asina purba frena e posibilidad cu un turista di un zona infecta cu COVID-19, por yega Aruba y pega mas hende riba nos isla. Autoridad competente ta sigura e portal aki cu e mechanism ta ‘in place’ cu lo frena e situacion aki.