Entidad di tres experto Hulandes lo mester dicidi riba nos pa 7 aña largo

ORANJESTAD – E entidad cu Hulanda a anuncia di lo crea esta un Zelfstandig Bestuurs Orgaan (ZBO), a bira conoci dialuna pa gobierno di Aruba. Den e documentacion di 218 pagina, Aruba a compronde cu e entidad en cuestion, lo   consisti di 3 experto Hulandes, cu a base di leynan Hulandes, lo tuma decisionan cu ta concerni comunidad di Corsou, Aruba y St Maarten pa un periodo di 7 aña largo. E entidad ta maneha pues tur tres isla. Aruba ( y e otro dos islanan) tin te diabierna (4 dia) pa acepta e condicionan aki di e entidad y demas exigencia, pa por ricibi fondo pa por sigui anda cu e crisis di COVID-19. 

SECRETO?

E informacion aki mientrastanto a bin via Corsou, pasobra na Aruba e informacion aki tabata desconoci. De hecho, como contesta na noticiacla.com dialuna, prome minister Wever Croes a bisa e portal aki cu e contenido di e documento aki (218 pagina y 18 condicion) ta ‘secreto di RMR’ y ‘no por wordo divulga’.   

RECHASO DI ARUBA

Mientras cu Aruba (y demas islanan envolvi) tin cu duna Hulanda contesta pa diabierna awor (3 di juli 2020), ya publicamente Gobierno di Aruba a laga sa di no ta aprecia e gesto aki y ta den reunionan for di dialuna riba e tema. Varios politico di e partido geel ya caba a menasa cu ta bay demanda Hulanda internacionalmente y tin indicacion cu Aruba no ta bay acepta e condicion poni. Oficialmente esaki no ta cla ainda pero a laga sa si cu no ta gusta e forma con Hulanda ta pone Aruba lomba contra muraya. Un minister a te hasta bisa cu Aruba ‘mester wordo trata cu mas respet’. Pa loke ta Corsou, e prome impression ta cu mayoria di e condicionan stipula pa Hulanda, ta afecta nos democracia y no ta cuadra cu nos leynan. Segun informacion, Hulanda ta hasta exigi delanta cu Parlamento mester bay di acuerdo cu un base amplio di e ley di consenso nobo y cambio di e ley existente den reino.