Hulanda a manda carta cu 18 condicion pa Aruba cumpli cu ne

ORANJESTAD – Gobierno Hulandes a manda un documentacion di 218 pagina conteniendo 18 condicion extra cu Aruba mester cumpli cu ne. Prome minister di Aruba Evelyn Wever Croes a bisa cu departamentonan concerni ta studiando e documentonan pa haya un miho bista di kico ta wordo exigi. “Esaki ta trece un complicacion den e forma con nos tin cu studia esaki y presenta esaki” Wever a bisa den un reaccion dialuna mainta. Ta trata di condicionan no solamente riba e aspect financiero, ni tampoco solamente supervision financiero, pero tambe riba enseñansa, sector financiero y husticia. E mandatario no por a duna mucho detaye riba dje ainda. 

TA CUMPLIENDO CU CONDICION TE AWO

A bisa si cu e carta cu a manda, ta bisa cu Aruba ta cumpliendo cu e condicionan poni te cu awor, cu excepcion di e punto cu ainda no a pone e Wever Croes norm den un ley. A duna Aruba te 1 di september 2020 pa cumpli cu e parti aki. Asina RMR ta bisa den e carta aki. Wever a splica cu a cuminsa traha e  ley, pero a pone tambe cu esnan cu ta bay traha awor den e forma aki, lo mester atene nan mes na e norma. Pa loke ta esnan cu ta cay den e rango aki (segun Wever ta un grupito, un man yen) ta esnan pa cual e ta afecta nan situacion pa cual tambe tin cu bay sinta y negosha cu nan pa sali for di esaki. Pero e condicion aki Aruba a haya te 1 september pa e keda regla.