Specialistanan indigna y preocupa cu situacion na hospital

ORANJESTAD – E situacion na hospital Horacio Oduber ta di tal indole cu specialistanan di e hospital lo ta hopi rabia y fada. Y den cuadro di e reapertura di frontera pa cu COVID-19, e situacion actual segun Noticiacla.com a compronde di fuentenan fidedigno, ta cu e hospital lo no ta prepara pa atende adecuadamente pa cu COVID-19. E specialistanan diadomingo a manda un carta indigna relaciona cu e situacion dirigi pa prome minister di Aruba, y cu copia pa instancianan na Hulanda. 

ICU OPERACIONAL?

A compronde cu e.o. mientras ta propaga cu tin 34 cama den cuido intensive (Intensive Care Unit), apenas 4 di e camanan realmente ta operacional. Y desde e candela recien na hospital, e situacion ta mas caotico cu nunca. Basa riba e situacion, e carta lo a wordo manda na nomber di ASHA (e asosacion di specialista) . Cu esaki kier ilustra cu e hospital lo tin reto pa trata casonan COVID awor cu frontera a cuminsa habri bek.

CANDELA

Manera raporta inicialmente, e candela recien a caba completa e situacion caotico na hospital unda cu ainda no por tin operacion regular, a lo menos cu e ta un emergencia. E situacion di asbesto a crea e situacion cu awor ainda hospital lo no ta prepara pa funciona manera un hospital normal, corda pa opera den un situacion di COVID-19 cu reapertura di frontera. 

COMPARACION 

Specialistanan ta compara e situacion manera un candela cu bo tin na bo cas. Debi na e candela, tur cos cu bo tin den bo poder, mester muda pa bo sala. Bo cushina, camber, cama, oficina, cacho, tur cos, ta muda diripiente pa bo sala, for di cual bo tin cu cuminsa biba y funciona. Asina e situacion ta wordo compara door di un specialista pa describi e situacion actual na hospital. Y cu reapertura, manera cu Crisis team mes ta bisa, no ta cuestion di si nos ta haya mas caso positivo di COVID-19, sino cuanto. Y cu e situacion di ICU no manera mester ta, e risico ta bira aun mas pio. 

REACCION MINISTER

E mandatario responsabel pa salud, sr Dangui Oduber dialuna mainta a reacciona pa e portal aki, confirmando e situacion cu tin na hospital pa loke ta e presion riba e capacidad. “ E candela berdad a pone un presion riba nos capacidad” e mandatario a bisa. “Nos a reuni den fin di siman cu SOGA y HOH pa soluciona e issue aki cu tin mas pronto posibel” e mandatario a bisa. SOGA (Stichting Onroerend Goed Aruba) ta e fundacion cu ta maneha e hospital su parti di construccion. No ta conoci ki tempo e situacion lo ta normalisa pa e hospital. Tin poco progreso si segun hospital a raporta recientemente, pero e no ta completo ainda.