Manager 'Just 4 Pet' : Doñonan di cacho conciente di ley di cacho y preparando pe

ORANJESTAD – Doñonan di cacho na Aruba, visiblemente a cuminsa actua y percura pa cumpli cu e ley di cacho nobo e aña aki. Manera ta conoci, cu cambio di aña autoridad a cuminsa actua caba pa enforsa e ley aki. Gerente di e pet shop popular “Just 4 Pet”, esta Aljereau Sophia, a nota esaki caba. “For di dos luna pasa mi a ripara e cambio” Sophia a bisa NoticiaCla.com, mientras cu e tabata sinta na e caha di e filial mas nobo di Just 4 Pet na Cumana. Segun Sophia, e fluho di hende cu ta bin en busca di material pa cumpli cu ley di cacho, a aumenta. Y ora cu nan bin, nan ta en busca di entre otro banchi, nametag y looplijn. Y pa Sophia, -cu ta sostene e ley di cacho-, e ta contento pasobra esaki ta nifica mas ‘business’ tambe pa e pet shop.

Segun Sophia, hopi cliente cu bin ta mustra cu nan ta conciente di e ley y su nificacion. “Tin ta bisa cu nan ta eens (cu e ley), y otronan no ta eens, y pakico”. Sophia mes ta admiti cu e ta di acuerdo cu e ley. “E ta un comienso pa haci e clientenan mas conciente di nan cacho”. Ora cu nan drenta, prome cos cu nan ta papia di dje ta e ley. “Aha e ley di cacho, kico nos mester, kico ta un looplijn. Nos mester di nametags (pa e cacho)”. Antes e tabata haya peticion pa nametags di cacho. Esey a aumenta. “Awor nan ta bin tur dia pa nametags”. Y for di dos luna pasa, a nota un aumento den e interes door di e benta. “Benta a crece” e gerente joven ta admiti. Hendenan ta conciente y ta cumprando lo necesario pa tene nan cacho safe.

Y Sophia ta contento cu ‘Just 4 Pet’ den su filial nobo, ta contento cu e loke nan ta experienciando. Considera como un ‘family business’, e rumannan Sophia hunto cu nan casa y, ta opera e dos tiendanan. Mientras cu nan no a habri oficialmente ainda na Cumana, nan ta habri for di net prome cu fin di aña 2014, y ta dunando servicio caba. Hendenan ta contento cu e localidad sigur. “Reaccion ta bon. E location ta bon”, Sophia ta bisa. E intencion tabata pa converti ‘Just 4 Pet’ den un ‘complete pet store’. Algo cu no tabata e caso na nan tienda original na Italiestraat. Awor esaki ta bira un hecho. Fuera di tin un pet shop, tin un veterinario y un grooming place. Pues un one stop shop pa hendenan cu gusta bestia. Nan no ta bende bestia si, pero tin tur facilidad pa esaki. Ta e intencion pa mantene e filial na Italiestraat habri, pa e clientela custumbra di e area ey. “E la bira un custumber”. Segun Aljereau Sophia, e veterinario estableci den e facilidad, tambe lo haya su mes ocupa cu e ley di cacho, den sentido cu nan lo chip cachonan pa identificacion. Y e demanda pa esey tambe ta halto. Fuera di esey, ta duna e cliente e servicio basico manera vacuna etc.