ORANJESTAD - Gobierno conhuntamente cu Crisis Team y otro instancianan concerni a anuncia diasabra cu ta habri frontera cu Merca toch entrante diabierna 10 di juli, pero cu exigencianan mas estricto pa 24 estado Mericano cu tin risico halto ainda pa COVID-19. Den cuadro di esaki, director di Direccion di Aviacion Civil diabierna a manda e anuncio pa tur operador di aviacion Mericano, cu ta bula pa Aruba, di e decision tuma pa gobierno di Aruba.
SITUACION MERCA
Gobierno a mustra cu manera ta conoci e pais di Merca ta mirando un crecemento significativo di casonan di infeccion pa cu Covid-19 den cierto estadonan. Den otro estadonan e casonan di infeccion ta bahando, y mester remarca cu mayoria di e turistanan ta bin di e estadonan aki, pues cu e casonan di infeccion ta bahando.
PASO NECESARIO
Sinembargo, Gobierno no kier core riesgo adicional. Pa e motibo aki despues di a evalua e situacion di cerca y siguiendo consehonan di expertonan den e area medico y epidemologico a dicidi di tuma pasonan necesario pa desminui e riesgo pa cu entrada di bishitantenan pa Aruba, y pa tuma pasonan adicional pa loke ta estadonan di halto riesgo. Segun expertonan esaki ta un strategia cu ta “safe” pa Aruba.
ESTADONAN CU NO TIN RISICO HALTO
Residentenan di Merca di estadonan cu No ta di halto riesgo, lo wordo permiti pa drenta Aruba, cu e condicion cu ta presenta un test di Covid negativo prome cu vuelo of na entrada na Aruba.
ESTADONAN CU TIN RISICO HALTO
Sinembargo residente di estadonan di halto riesgo lo wordo exigi pa hasi e test ayanan prome y solamente si e ta negativo y completa e proceso di ED card, por wordo permiti di drenta Aruba.
Esaki ta significa cu e opcion di haci un test na Aruba na yegada NO lo ta aplicabel pa e bishitantenan aki.
E rekisito aki lo ta aplicabel pa residentenan di e siguiente estadonan: Alabama, Arizona, Arkansas, California, Colorado, Florida, Georgia, Idaho, Iowa, Kansas, Louisiana, Mississippi, Nevada, North Carolina, Ohio, Oklahoma, Oregon, South Carolina, South Dakota, Tennessee, Texas, Utah, Wisconsin, Wyoming.
Gobierno lo sigi monitorea e situacion na Merca tur dia y lo evalua cada dia kico lo ta e pasonan cu mester wordo tuma pa asina salvaguardia e siguridad di nos comunidad y nos bishitantenan. Ta di remarca cu Aruba su mercadonan principal ta riba bon caminda y ta manehando e virus aki den un manera positivo.
Aruba ta sigui ta un destinacion hopi popular pa e mercado di Merca pero manera ya menciona tur medidanan mester wordo tuma na cuenta pa asina sigura cu nos isla por maneha e situacion di salud na un manera responsabel. Lesa e carta manda pa Merca AKI.
ORANJESTAD – Conocido presentador di television Hulandes Yvon Jaspers a tende cu e ta un condecorado Real, ora cu e tabata na Aruba e siman aki. E la yega Aruba diahuebs, y a haya e yamada diabierna mainta. Pesey e no por a ricibi e premio personalmente. Tabata alcalde di Loenen aan de Vecht, di su premio, cu e la ricibi pa su trabou di television. E ta enfoca riba e bida di cunukeronan Hulandes entre otro.
ORANJESTAD - Diabierna 26 di april 2024 pa 7’or di mainta (ora local) a publica e edicion special di Staatscourant incluyendo un lista di e personanan na kende a otorga un Condecoracion Real e aña aki. Tradicionalmente e momento festivo aki, tambe conoci como Ocasion General, ta relaciona cu e cumpleaño di Su Mahestad, Rey Willem-Alexander, cu ta e Granmaestro di e condecoracionnan. Por otorga un condecoracion na personanan cu a duna un contribucion special na e sociedad.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.