Polis a detene 9 persona despues di un di e manifestacionan diabierna anochi

ORANJESTAD - Awe diabierna henter dia Cuerpo Policial a guia 3 diferente manifestacion.  Segun version di polis, nan a  informa  cu dos di e gruponan a sa di comporta nan mes como debe ser. Na final polis a informa cu nan a guia e grupo lidera pa sr Regi Danies cual no tabata un tarea facil, segun polis a raporta diabierna anochi. “ Tur hende tin e derecho conforme nos constitucion pa manifesta y expresa nan opinion. Nos di Cuerpo Policial sigur ta convivi cu e causa aki y a laga señor Danies manifesta y expresa su opinion” vocero di polis Lito Laclé a informa. Cuerpo Policial  a duna e grupo di sr Danies te cu 10 or di anochi pa ta ariba caya. Pa 10 or di anochi polis a dunanan orden pa bandona e sitio y no stroba trafico . Nan  no kier a cumpli cu e orden encuestion y Cuerpo Policial a bay over na detene un total di 9 persona pa no sigui orden di polis. E personanan aki a wordo transporta pa warda di polis pendiente investigacion.