Manifestantenan na gobierno: ‘Nos no ta pidi, nos ta exigi!’

ORANJESTAD – Cu e grito ‘Nos no ta pidi, nos ta exigi’, centenares di manifestante (mayoria bisti na preto cu lemanan contra violencia, a marcha di edificio di Corte di Husticia pa Parlamento y despues Bestuurskantoor pa eynan entrega un manifiesto na nomber di muchanan di Aruba cu a keda abusa. Mientras cu e centenares di ciudadanonan tabata acomoda nan mes na e sitio, nan tabata grita ‘Nos no ta pidi, nos ta exigi’, pa mustra nan frustracion di hopi tempo. Cu e grito, nan a mustra cu nan no tempo di pidi a pasa, y awor ta exigi. Asina mes e grupo a keda respetuoso y ordena. Tanto presidente di parlamento Ady Thijsen como prome minister Evelyn Wever y su coleganan minister Andin Bikker y Glenbert Croes, a papia cu e manifestanenan y su representante Yuri Bracho, y a priminti nan cu otro siman lo topa cu un comision cu ta representa e manifestantenan y asina atende nan preocupacionan mas miho. A splica di e leynan cu a pasa recientemente aunke cu falta mas. “Mi sa cu a priminti cu ta pasa ley den 6 minuut pero esaki lamentablemente no a logra ainda” Wever a bisa e manifestantenan. Mes momento por a compronde di e prome mandatario cu den tur su tempo den politica, e no a wak asina hopi hende manifesta, pero pa un bon causa, cual e ta aprecia.