Minister ta intermedia entre SMAC y MUSICA pa evita posibel problema

ORANJESTAD – Enbes di para na banda y wak un posibel asunto rementa den porta di carnaval y bira un problema, minister di Cultura a intermedia. E mandatario, Otmar Oduber, a confirma na NoticiaCla.com cu e la invita tanto miembronan di fundacion SMAC (Stichting pa Maneho di Aruba su Carnaval) y MUSICA pa un reunion urgente pa dialuna awor 10 ‘or. Mientras cu inicialmente e mandatario a splica NoticiaCla.com cu e motibo ta pa ‘desea tur hende un bon carnaval’, e la bisa tambe cu e motibo ta pa percura pa ‘tur hende ta riba e mesun pagina’. E reunion segun Oduber, ta necesario ‘prome cu e bira un problema’. Mas e mandatario no por y kier a bisa riba e asunto aki.

E problema lo a cuminsa ora cu partidonan a cuminsa reclama otro riba supuesto pagonan pa por organisa e festival di Calypso y Roadmarch. Sumanan cu tabata debe, y of cu mester a wordo paga, pero cu no a tuma lugar lo ta motibo pues di e problemanan actual. E mandatario a dicidi cu ta gara e toro na su cacho y cay aden y purba evita cu e lo a bira un problema mas grandi. Foto di archivo ta di e fiesta di 11-11-2014 ora cu SMAC a inicia temporada di carnaval.