Aruba Airlines ta sigura salud di su empleadonan despues cu uno a test positivo pa COVID-19

ORANJESTAD - Aruba Airlines ta sigura salud di su empleadonan despues cu uno a test positivo pa COVID-19. Asina e compania a declara diabierna mainta pa medio di un comunicado. E aeroliña ta raporta cu na luna di Juni, durante un proceso di mantención rutinario, a hanja su mes confronta cu un incidente unda e avión CRJ a worde accidenta y gerencia a tuma e decision inmediato di manda repara esaki na JacksonVille.  E avion a keda cla y dia prome di juli Aruba Airlines a re inicia su vuelo nan pa Korsou, pa cual motibo a sali cu un delay, mirando cu e avion a yega e mainta ey mes for di Merca un poco mas laat cu anticipa.

TRIPULANTE A TEST POSITIVO 

Un di e tripulante, den e caso aki e co piloto cu a trece e avion bek for di JacksonVille, a test positivo pa cu Covid-19 y di inmediato Aruba Airlines a tuma tur e pasonan necesario pa sigura e salud di tur su empleadonan, desinfectando e mesun dia tur e edificionan y propio avión segun protocolnan.  E avion ora a bin for di JacksonVille, no tabata tin pasahero. Unabez cu a constata e caso positivo aki, e persona en cuestión a wordo isola y tur protocol fiha pa DVG a worde sigi. Danki Dios nos colega ta den bon condicion di salud y na e momento nan aki ta na hospitaal pa observacion. 

A SIGUI PROTOCOL DI SEGURIDAD

Aruba Airlines ta sigura tur su pasaheronan cu protocol nan di seguridad y salubridad ta wordo sigi estrictamente pa asina por garantiza e bienestar di tur su empleadonan y nos pasaheronan.  Vuelonan programa entre Aruba y Corsou ta continúa manera e itinerario normal riba diadomingo, dialuna, diaranson y diabierna. Gerencia y personal di Aruba Airlines a desea nan colega tur clase di exito y un pronto recuperacion.