SIMAR: No por acepta cu ta cera Prins Bernhard School toch

SIMAR: No por acepta cu ta cera Prins Bernhard School toch

Posted on 07/3/2020 10:31 am AST | Updated on 07/3/2020 10:35 am AST

ORANJESTAD – Awe mainta cu sosten di mayornan, docente y alumnonan di Prins Bernhard School na San Nicolas, sindicato di maestro SIMAR a duna di conoce cu nan no ta di acuerdo cu e maneho di e minister di enseñansa Rudy Lampe riba e hecho cu awe ta e fecha riba cual e scol mester cera su portanan. E intencion ta pa e scol cay bou di un fundacion y cambia di formato di enseñansa. Algo cu SIMAR y esnan presente no ta di acuerdo. 

K-12

E intencion di minister ta cu e scol awor lo mester bay cay bou di e sistema di K-12 cu ta un sistema Mericano online, unda cu e alumnonan ta haya enseñansa digital for di Merca, y ta siña den nan ambiente y riba nan propio forza. E forma aki ta existi desde 2000 na Merca. Algo cu e sindicato no kier pasobra e no ta bay funciona y ademas ta mucho mas caro.

MOTIBO PA CERA SCOL

Segun e presidente di e sindicato Josephine Albertus, a tende un sin fin di motibo pakico mester cera e scol. Entre nan cu e resultadonan no ta bon, cu e forma con e scol ta opera, no ta manera un scol mester opera y como tal no por cataloga esaki como un scol, y tambe cu docentenan ya caba tin otro trabou. Ademas e cabesante lo a bay di acuerdo pa cera e scol. Pues tin varios motibo pa cual lo mester cera e scol. Segun Albertus, lo a hasta intimida e cabesante pa medio di cartanan. 

CABESANTE

Segun Albertus, e cabezante ta sigura cu ningun momento a sinta cu e  minister en cuestion riba ceramento di Prins Bernhard School. For di comienso e cabesante lo ta para tras di su team di docente y alumnonan. E hecho cu e docentenan lo tin otro trabou caba cu e formato nobo di e scol, no ta berdad pasobra a manda e docentenan bay solicita pa e trabou. Y esaki no ta un garantia cu e docente lo haya e trabou. “E ora no por bisa cu e docentenan ya caba tin un otro caminda di bay”. E garantia cu docentenan tin ta e carta di minister presidente Wever Croes a manda dia 16 di juni ultimo caminda ta bisa cu Prins Bernhard School ta keda habri pa aña 2020/2021. Esaki ta un garantia cu e docentenan lo tin trabou pasobra e formato lo no cambia. Supuestamente e minister lo a indica cu e carta di minister presidente ta un eror humano cu a laga e scol riba e carta, pero no a clarifica e eror aki cu un otro carta. Pues segun Albertus, e carta actual di 16 di juni ta keda vigente. 

 

  • Zulo
  • Postobon
  • Powered by SETAR