Ta evaluando si ta wanta cu reapertura di frontera cu Merca

ORANJESTAD – Aruba ta evaluando si ta wanta cu reapertura di frontera cu Merca poni ainda pa dia 10 di juli, of si ta permiti solamente entrada pa Aruba for di cierto parti di Merca. Y esakinan lo ta partinan cu si tin COVID-19 bou di control Asina prome minister Evelyn Wever Croes a bisa diaranson anochi durante e briefing riba COVID-19. Segun e mandatario, e situacion na Merca no ta bayendo manera cu a pensa, cu e por a bay. “Nos ta monitoriando e desaroyonan den diferente estadonan na Merca pa asina nos evalua y tuma un miho decision” Wever a bisa. A bisa cu a dicidi cu no ta bay core riesgo na momento cu habri e frontera. Entre e zonanan ‘for di control’, tin Miami cu ta un gateway pa Aruba, cu tin buelo planea pa dia 10 di juli caba. E buelo aki, awor posiblemente por wordo posponi. 

DIFERENTE OPCION

E mandatario a bisa cu ta evaluando diferente opcion cu tin. Entre e opcionan cu tin, ta cu e hotzones manera Florida no ta wordo permiti pa bin Aruba. Of ta bin cu extra exigencia di testmento for di e zona ey. Ta cosnan cu ta evaluando. Tin hopi garantia y reglanan poni na Aruba mes cu ta locual por duna Aruba mas trankilidad, 

CAMBIO DI MANEHO

Riba pregunta di noticiacla.com, CEO di ATA Ronella TjinAsjoe, a confirma cu contrario na e decision inicial di Merca cu no ta permiti pa habri partinan so como gateway pa Aruba, sino full Merca, esaki mientrastanto a cambia. Deliberacion cu entre otro Consulado Mericano y otro instancianan, a logra convence Merca cu por usa cierto gatewaynan so, dependiendo e nivel di control di e virus, y cera otro gateway. Anteriormente, tabata asina cu enberdad a bisa cu no tabatin e opcion ey. Sea tabata biaha for di tur gateway di Merca pa Aruba, of no ta biaha for di Merca pa Aruba. Esey awor ta cambia.