Sabotahe posibel motibo di blackout na Bonaire

KRALENDIJK – Diasabra marduga Bonaire a sufri un blackout ora cu coriente a bay riba henter e isla, for di cuarto pa dos di marduga. WEB mesora a inicia un investigacion riba e causa y e embergadura di e problema. For di cuarto pasa di 7 mainta, e network di coriente tabata cla pa suministra coriente atrobe. Pa fin di mainta, Bonaire completo tabatin coriente atrobe.

E problema di coriente ta debi na un destruccion riba e kabel fibra optica cu ta percura pa e comunicacion entre WEB y ContourGlobal. No ta descarta cu esaki por ta trabou di sabotahe. WEB mientrastanto a entrega un keho na Polis y ta investigando e caso profundamente.

Tin indicacion cu e kabel principal tambe a sufri daño. Si resulta cu mester haci cambio na esaki, mester kita coriente completo atrobe na Bonaire, pa por cuminsa cu trabou di reparacion. Esaki lo cuminsa pa diadomingo marduga 6:30. E trabounan lo dura por lo menos 8 ora, pa cual WEB a pidi despensa pa e inconveniencia.