Aruba no tin personanan den cuarentena mas pa COVID-19

ORANJESTAD – For di diaranson 1 di juli 2020, Aruba no tin ningun hende mas den cuarentena, pa e virus di COVID-19. Asina prome minister Evelyn Wever a confirma diaranson mainta. Mientrastanto Aruba tin 2 caso positivo atrobe, di cual uno ta na cas, y otro ta den hospital. Ambos ta den situacion OK. 

CUARENTENA

Nos no tin ningun persona mas den cuarentena pasobra entrante awe tur hende mester hasi test. Esnan cu tabata den cuarentena y esnan cu drenta Aruba. “Awor ta abo mester cuida bo mes y cuida bo famia. Cu fe y optimismo nos ta drenta e etapa nobo den e crisis aki. Nos tabata exitoso den e prome etapa y nos lo ta exitoso den e di dos etapa tambe” Wever a finalisa bisando. Frontera mientrastanto a habri diaranson pa Europa, Canada y Caribe (cu excepcion di Republica Dominicana y Haiti), aunke e prome avion comercial lo yega diasabra awor for di Hulanda.