Arends: Gobierno actual tabatin poder pa mantene su autonomia financiero

ORANJESTAD – Gobierno di Aruba lo por a para Hulanda di tuma autonomia financiero di Aruba. Asina miembro di fraccion di AVP den parlamento Richard Arends a bisa noticiacla.com diaranson. E ta reacciona asina riba e ponencia di fraccion di e partido geel (MEP) den Parlamento, cu ta AVP ta esun cu a pone Aruba perde su autonomia financiero na 2015. Pa loke ta e dos condicionan cu Hulanda a pone pa Aruba por haya mas placa, e fraccion berde ainda ta wardando informacion y documentonan di Gobierno. 

REUNION DIABIERNA 

Fraccion di AVP ta pendiente e reunion diabierna unda cu gobierno tin cu informa Parlamento riba e situacion cu a surgi e siman aki. Esaki riba e dos condicionan impone pa gobierno Hulandes, pa Aruba por haya fianza pa sigui yuda cubri e crisis di COVID-19. Uno ta e entidad independiente cu tin cu controla e fondonan cu Hulanda ta fia Aruba, y e incorporacion di Aruba den e ley di Reino pa supervision financiero. Loke nan sa te awor, segun Arends, ta solamente loke a keda publica pa gobierno den medionan di comunicacion. 

LAMENTABEL

Segun Arends, e condicionan cu Hulanda a impone riba Aruba, e entidad independiente cu lo fia e islanan placa, via un ley di Reino, riba su mes ta algo comprendible, mirando e situacion y e limite di aceso na mercado internacional cu Aruba tin, pero mester tene cuent cu cualkier impacta cu e por tin riba nos mercado financiero local. E ta bisa si cu e no conoce e detayes ainda. Pa loke ta e incorporacion di Aruba den e ley di Reino pa supervision financiero (RFt), e ta considere como algo cu ta lamentable. Esaki pasobra enbez di ‘actualisa’ e ley di LAFt, Parlamento a opta pa hinca un amienda den e ley, cambiando e contenido di e ley, cu a pone cu gobierno ‘no tabata cumpli mas cu e palabracionan haci cu Hulanda na november di 2018, segun Arends. E parlamentario ta sigur cu si e LAFt tabata vigente awe, podise nos no tabata den e posicion caminda Hulanda ta pone su exigencia pa incopora Aruba den e ley di Reino menciona. Arends ta recorda cu na 2014 tambe Hulanda tabatin e exigencia ey, esta di hinca Aruba den e ley aki. E tabata riba agenda di Hulanda pa basta tempo, pero na 2014 gobierno di AVP a logra di negosha e LAFt esta den un ley local, e parlamentario a sigui bisa.

AVP A ENTREGA AUTOMIA FINANCIERO?

Segun Arends, e no ta comparti e pensamento di partido MEP y e gobierno di gabinete Wever Croes, cu AVP lo a entrega autonomia financiero na Hulanda, pasobra e loke AVP a logra ta cu mientras tin e supervision berdad, AVP a logra cu Aruba su Parlamento a keda cu poder pa haci cambio e tempo ey y Gobierno cu discrecion pa aloca fondonan con cu e kier irespectivo di e signatura politico. Pero cu e cambio di LAFt pa RFt, esaki ta bira un cambio totalmente diferente. ‘Un total different ballgame’. “Bo mester di consensus entre e Paisnan di Reino pa drenta aden, y bo mester di consensus pa sali afo’.”Bo no por culpa partido AVP di esaki, pasobra hustamente na 2015, ora cu esaki tabata riba mesa, nos a sa di negosha e LAFT, caminda nos ta mantene nos autonomia financiero di nos pais y delega e autoridad pa duna un aanwijzing na Conseho di Minister di Reino. Y si ta asina mes cu AVP a entrega e autonomia, cual no ta e caso, e gobierno actual di MEP tabata den tur nan capacidad pa por a stop e, pero esey no tabata e caso” Arends a sigui bisa. Riba e pregunta, con asina gobierno actual di Aruba lo por para Hulanda di kita e autonomia financiero, Arends a bisa, cu esaki tabata posibel, door di mantene e LAFT manera cu e tabata.