Aruba a habri su man pa ricibi su bishitantenan internacional bek awe

ORANJESTAD – Mientras cu awe frontera di Aruba ta habri pa paisnan di Europa, Canada y Caribe (excepto Haiti y Republica Dominicana), ta te diasabra e prome avion comercial ta yega, manera cu noticiacla.com a raporta ayera. Esey no a kita afo cu Aruba ta ‘celebrando’ e momento aki menos. Cu hopi aviso, video y mensahe, for di gobierno te na stakeholdernan, por a nota un ola di mensahe positivo dirigi na e momento importante aki.  For di e pagina di Facebook di aeropuerto di Aruba, e portal aki a tuma un video promocional pa e mercado Europeo, unda cu na e idioma Hulandes, ta yama e turista biahero bon bini. 

PROME BUELO COMERCIAL

Pa loke ta e prome buelo comercial, esaki lo ta un buelo di KLM cu lo yega Aruba dia 5 di juli 2020. Pues di diaranson pa diasabra, no tin ningun buelo comercial, fuera di buelonan entre islanan ABC. 

SCHEDULE

Fuera di e buelo di KLM di diasabra, tin un buelo di TUI cu ta te dia 11 di juli proximo. Pa loke ta Merca, ora cu Aruba habri frontera dia 10 proximo, (si esey keda manteni), Aeropuerto tin 6 buelo programa pa e fecha ey. Entre e buelonan ey, tin buelo di New York, Miami, Atlanta y Boston. Ta buelonan di e.o. American Airlines, JetBlue y Delta Airlines. No ta conoci cuanto pasaheronan lo ta riba e buelonan aki. 

REKISITO

Mientras cu Aruba a pone su condicionan pa e pasaheronan cu yega, e aeroliñanan mes a ponenan condicion tambe. Entre nan, tin American Airlines cu for di awe ta exigi tur su pasaheronan tin documentacion cu nan tabata COVID free, pa 14 dia prome cu nan buelo. Esaki tin algun turista preocupa y rabia for di Merca. Tin otronan cu ta rekeri cu bo tin un declaracion 72 ora prome cu buelo cu bo ta COVID free. Aki tambe tin cu tin problema cu esaki, pasobra e test no ta cla den e periodo aki na cierto caminda na Merca. E ta bira un inconviniencia pa e pasaheronan, manera nan mes ta splica riba e.o. e portal official di Aruba. 

BUELO COMERCIAL

Como clarificacion, por menciona cu mientras cu tabatin buelonan di p.e. KLM cu tabata yega Aruba regularmente, esaki no ta mesun cos cu un buelo regular comercial. Buelonan cu a yega, tabata sea buelonan humanitario y of di repatriacion, cu ta trece solamente yiu di tera pa nos isla. E diferencia ta cu awor ta habri esaki pa tur pasahero cu biaha di Europa, cu no ta local. Nan por cumpra un pasashi regular y biaha pa nos isla. Esey ta e diferencia grandi.  

BUELO DI MERCA

E reapertura di frontera pa Merca ta programa ‘ainda’ pa dia 10 di juli 2020, aunke cu tin preocupacion di hopi pa cu e situacion di COVID-19 na e pais aki. Como tal e siman aki gobierno a bisa cu mientras cu e plan ta sigui, pero si mester, por adapta e decision aki den sentido cu por aplasa e fecha aki mas leu. E lugarnan di Merca cu ta cuminsa buelo ta entre otro Boston y New York, cu tin e situacion bou di control. Pero tambe tin destinacion manera Miami for di cual tin buelo programa pa yega Aruba dia 10 di juli proximo. Miami ta un di e destinacionan cu no tin e situacion for di ta bou control. Pues e miedo ta keda, pero proximamente prome cu e fecha di 10 di juli proximo, lo tin un decision si e fecha ey ta keda manteni of no. 

CANADA

Canada tambe ta un pais cu ta ‘welcome’ na Aruba entrante mayan, pero aki tambe no por spera bishitante mesora, sino te dia 18 di juli, esta casi 3 siman despues cu e frontera habri. E siguiente buelo lo ta dia 8 di augustus. E reto pa Canadesnan ta mas ainda, mirando cu gobierno di e pais en cuestion, a impone un cuarentena obligatorio pa tur Canades cu bolbe nan pais, di 14 dia. Pues tur turista Canades cu biaha pa Aruba, ora cu nan bolbe nan pais, tin cu bay den e cuarentena ey. Wak e video promocional di ATA AKI. Potret di cover ta cortesia di AAA NV.