Caribe Hulandes preocupa cu e 'entidad' nobo di Hulanda

PHILIPSBURG/ORANJESTAD – E entidad nobo cu Hulanda ta ‘creando’ pa maneha e fondonan di likides cu e ta bay duna e islanan Aruba, St Maarten y Corsou, tin preocupacion di e respectivo islannan. Prome minister di Aruba Evelyn Wever Croes a comparti su preocupacion dialuna pa cu e constelacion di e entidad, y cu faltando apenas 3 dia di trabou, no ta conoci kico esaki lo encera. St Maarten su prome minister Silveria Jacobs tambe ta preocupa cu e ‘entidad’ nobo aki.

E ENTIDAD

Tabata na mei cu Hulanda a informa e islanan cu lo bin un entidad cu lo tin cu monitor e maneho di e fondo cu e ta bay duna. E entidad ta un di e condicionan cu Hulanda a pone pa por fia placa. Problema ta cu nada di e entidad no ta conoci ainda. Ni ken ta forma parti di dje, con e ta bay opera, y a base di kico. Tanto Jacobs como Wever a haci varios peticion pa informacion y a wordo priminti cu lo haya e informacion. Pero te cu diamars mainta, Aruba ainda no a haya nada. Segun Jacobs mientrastanto, e ta riba agenda pa wordo atendi durante un reunion diahuebs awor.

REGULA DEMOCRATICAMENTE

Segun Jacobs, Secretario di estado Knops a sigura cu e entidad aki lo tin un ‘structura democratico regula, organisacion gubernamental Hulandes independiente’. E trabou ta cu e entidad lo ta encarga cu e supervision di e fondonan di likides, monitoria  e acuerdonan pa pais, y lo ta maneha a base di resultado. Ademas e lo ta abase di articulo 38, paragrafo 2 di e Statuut, cu ta rekeri un cambio den ley di consensus di Reino. E structura di e entidad sinembargo no ta mucho cla, como cu e base legislativo ainda ta wordo finalisa segun Knops, Jacobs a bisa. E islanan Aruba, Corsou y St Maarten a haya promesa cu e documentacion relaciona na e entidad lo a wordo manda dialuna dia 29 di juni 2020. Aruba mientrastanto te cu dialuna anochi, ora di Aruba, no a ricibi nada ainda. 

AUTONOMIA

St Maarten ta preocupa cu e efecto cu e entidad lo tin riba e autonomia di e pais. Tambe ta cuestiona e input cu e pais lo por tin riba e constelacion di e entidad y su timeline di su implementacion. Mientras cu dia 3 di juli 2020 (fecha riba cual RMR tin cu dicidi) ta yegando cerca, tin hopi pregunta cu ainda no tin contesta ariba. A mustra cu si e documentacion necesario tabata den poder di e islanan dialuna, esey ainda tabata laat y ta laga poco pa nada di tempo pa por consulta riba esaki localmente di e efectonan.