Huez a nenga peticion pa para referendum di Eagle Beach Resort

ORANJESTAD - Corte a nenga peticion pa para referendum di Eagle Beach Resort cu mester tuma lugar awe. Tabata dialuna (ayera) cu Corte den Prome Instancia na Aruba a trata e peticion di parti di Eagle Resort & Casino Aruba contra Mediador di Gobierno pa pospone e referendum bou di su empleadonan solicita door di sindicato FTA, cual referendum tin cu tuma lugar awe mainta cuminsando pa 8:30 di mainta.

E hotel di su banda a argumenta cu Mediador di Gobierno lo a crea e expectativa serca nan cu e referendum no lo mester a tuma lugar pasobra durante di algun combersacion e lo a indica di ta dispuesto pa intermedia pa cu problemanan cu por ta exisiti na pia di trabao. Pesey un referendum lo no ta necesario. Segun Juez sinembargo e hotel no por a saca e conclusion aki. Un apelacion riba e "principio di confianza" pues no por wordo haci cu exito.

Cu Mediador no lo a actua diligentemente y/o a haci mal uzo di su autoridad como Mediador (Detournement de Pouvoir) tampoco por wordo conclui, segun Juez. Mediador a ricibi un peticion pa referendum y a procesa esaki segun e exigencianan di ley.

Pa cu e ponencia cu door di e Corona-crisis un negociacion di CAO no ta oportuno, Juez a considera cu un referedum ta unicamente pa determina cua sindicato ta esun apunta pa negocia den nomber di trahadornan. E eventual resultado di negociacion di un CAO no ta relevante pa e desicion den e caso.

Basa riba lo antes menciona e peticion pa suspende e referendum a wordo nenga. 

FTA ta haci un peticion na tur empleado cu derecho di voto di Abura Development Corporation VBA (8:30-10:00), Eagle Aruba Casino Operating Corporation N.V. (10:30-12:30) y Eagle Aruba Resort Operating Corporation VBA (1:30-3:00), pa haci uzo di nan derecho di voto durante e votacion di mayan. Presenta bo mes na tempo y cu un identificacion valido pa asina haci uzo di bo derecho di voto. Por lesa e sentencia AKI.