Trahadonan di Interport Logistics a bay den accion

ORANJESTAD – Un total di 22 trahadonan di e compania cu ta maneha carga na Aruba, Interport Logistics, a pone trabou abou debi na asuntonan cu ta afecta nan situacion laboral. E persona encarga cu Departemento di Keho y Conflicto di FTA, sr Bremo a splica cu trahadonan no ta tuma mas y kier mustra nan malcontento di e forma aki. Mientrastanto a convoca un reunion cu abogado di e compania y e gerente y pendiente e resultado di e reunion aki, e trahadonan lo evalua si nan ta sigui cu nan accion of no. 

KICO A PASA

E compania a opta pa busca tercer partido (otro compania) pa haci algun trabou cu normalmente ta toca Interport Logistics mes. Esey a cay den mal tera, mirando cu compania ta tumando decisionan ultimo tempo cu ta perhudica e trahadonan den diferente forma, sigur nan entrada. Fuera di esaki, tin mas asunto pendiente laboral, a dicidi pa bay pa e arma di accion. A informa compania pa medio di un carta cu ta bay tin accion, y kico e motibo di esaki ta. 

ABOGADO

E abogado di compania a contesta hopi liher pa pospone e accion y bay den reunion di biaha. E reunion mester a tuma lugar 8or ora cu e accion a tuma lugar. Pero despues a pidi pa hala e reunion pa 9or y a informa e compania cu e trahadonan no ta bay traha te ora cu e reunion aki tuma lugar. Den e reunion di awe mainta, e trahadonan lo mester a tende kico e motibo ta cu a opta pa e compania duna trabou na tercer partido.”Nan no ta informa e trahadonan di kico ta pasado” Bremo a bisa. E ta mustra cu tur e cosnan aki por wordo evita si ta tene reunion y splica trahadonan aki. 

MAS ASUNTO

Segun FTA, ta for di maart tin asuntonan cu ta tumando lugar cu no ta corecto. Entre otro e efecto di COVID-19 a pone cu tin un discrepancia di pago pa trahadonan. Tin mester a busca FASE, tin cu mester a corta den salario y asina tin un cantidad di ‘issues’ segun e shopsteward cu tin. Y nan ta asina hopi cu por a pone un accion te hasta prome. E trahadonan awor ta pendiente e resultado di e reunion pa wak kico ta pasa.