Mayoria asistencia na Hospital tabata pa accidentenan di auto

ORANJESTAD - Departamento di Emergencia tabata bastante ocupa durante e ultimo dianan pero tabata prepara pa esaki, atendiendo un total di 173 pashent. Durante bispo di aña y aña nobo, cuminsando desde 31 di december 2014 pa 12or di merdia te cu dia 2 di januari 2015 pa 6or di mainta, Departamento di Emergencia a atende 173 pashent di cual 35 a wordo admiti den Hospital y a registra 26 pashent relata na incidentenan.

E edad di pashent di incidentenan a varia entre 5 aña pa 71 aña y solamente 5 pashent tabata di un gravedad pa ser admiti den Hospital. Di e 26 pashent cu a drenta Departamento di Emergencia relata na incidentenan 13 a consumi alcohol. A atende 17 pashent pa via di accident di auto, 7 a drenta pa motibo di maltrato y 2 pashent cu herido causa pa vuurwerk. Di e 2 victima di vuurwerk 1 tabata di un gravedad halto pa ser admiti den Hospital.

Dokter di Warda of conoci manera Huisartsenpost tabata bastante trankil. Akinan a mira solamente 22 pashent riba e ultimo dia di 2014 y dia 1 di januari 2015 a mira un total di 52 pashent. Hospital ta informa cu su orarionan di bishita ta sigui normal cu ta di 11.30 di mainta pa 1or di merdia y 6or pa 8or di anochi. Departamento di ICU/MCU/CCU tambe ta sigui su orario regular pa bishita cual ta entre 12or cu 1or y 7or pa 8or.