Wever: Hulanda kier Aruba acepta ley di reino di supervision financiero sino no ta haya placa

Wever: Hulanda kier Aruba acepta ley di reino di supervision financiero sino no ta haya placa

Posted on 06/29/2020 11:58 am AST | Updated on 06/29/2020 12:05 pm AST

DEN HAAG/ ORANJESTAD – Hulanda kier pa Aruba bay di acuerdo cu e ley di reino pa supervision financiero. Si Aruba nenga, Aruba no ta haya e suma di 204 miyon. Asina prome minister Evelyn Wever Croes a bisa dialuna mainta durante conferencia di prensa. E mandatario a bisa cu diadomingo durante un combersacion largo cu secretario general di Hulanda Raymond Knops, el a bin tende di e condicion nobo aki, prome cu Aruba haya e suma di 204 miyon florin. Segun Wever, Aruba lo no acepta sin mas, y a exigi di e mandatario Hulandes, pa pone esaki riba papel pa por wak kico exactamente esaki ta nifica. 

BON TRABOU PERO..

Segun Wever, Hulanda a elogia Aruba pa su forma di atende cu e situacion financiero, y cu a cumpli cu tur e puntonan y como tal, ta cla pa haya e suma di 204 miyon florin diabierna awor. Esaki ta balido pa cubri luna di juli, augustus, September proximo, cu tin cu cubri gastonan di gobierno (salario, operacion di gobierno) y fondo manera AOV, AVV y di pensioen. Pero, ta despues di esaki, a bin e sorpresa cu ta exigi pa Aruba bay di acuerdo pa forma parti di e ley di reino pa supervision financiero, manera cu Corsou y St Maarten forma parti di dje. Riba pregunta di noticiacla.com na e prome mandatario, si Aruba no bay di acuerdo cu e exigencia aki, Aruba no ta haya e placa cu e mester diabierna awor. Y si esey sosode, esey ta bira un problema serio pa nos isla. E mandatario no kier bay delanta kico lo pasa, pero si ta bisa cu e situacion ta uno serio. NOTA: E potret ta uno di archivo di noticiacla.com

  • Ley pa prohibi competencia inhusto (cartel) aproba den Parlamento

    Ley pa prohibi competencia inhusto (cartel) aproba den Parlamento

    ORANJESTAD - E ley di  mededinging  aproba unanimente den Parlamento e siman aki. E ley aki ta pone un final na abuso di poder economico di algun comerciante cu tin posicionnan di monopolio y tambe ta stroba e formacion di cartel. A base di e ley aki, consumidornan mester por haya miho producto y servicio na un prijs hopi mas husto. 

  • Debi na COVID-19, otorgamento di Condecoracion Real a bay diferente

    Debi na COVID-19, otorgamento di Condecoracion Real a bay diferente

    ORANJESTAD - Diabierna mainta, 3 di juli, 17 Arubiano a ricibi nan Condecoracion Real for di Gobernador Alfonso Boekhoudt. E otorgamento di condecoracion, cu tradicionalmente ta wordo teni un dia prome cu Dia di Rey, no por a tuma lugar e dia ey e aña aki pa motibo di e consecuencianan di e COVID19-virus. E personanan cu a ricibi e condecoracion a wordo yama anteriormente door di Gobernador, for di ken nan a tende cu nan ta bin na remarke pa ricibi un condecoracion real. E condecoracionnan aki ta wordo entrega anualmente na personanan cu haci un impacto excepcional den nos comunidad. Pa motibo di  e regla di distanciamento social di 1,5 meter, e condecoradonan a ricibi e condecoracion den nan man, y e no a wordo adheri riba nan paña door di e Gobernador. E condecoracion a wordo entrega den un caha luhoso, y despues e condecoradonan mes por a bisti esey riba nan paña.

  • A extendi fecha pa solicita expresion di interes pa Cannabis Medicinal

    A extendi fecha pa solicita expresion di interes pa Cannabis Medicinal

    ORANJESTAD – Gobierno di Aruba a extende e fecha pa solicita expresion di interes pa Cannabis Medicinal. Esaki debi na e problema cu COVID-19. Asina minister di salud Dangui Oduber a confirma diahuebs. Manera ta conoci, dia 2 di maart 2020 su ministerio a publica e asina yama “Request for Expression of Interest” (REOI). Esaki a wordo publica como parti preliminario di e exploracion di e Ministerio cu e intencion pa explora y determina e interes di e partidonan den e mercado di cannabis medicinal. Pa wak si e partidonan tin e interes di forma parti di e indutria nobo di cannabis medicinal na Aruba y pa inventarisa ki tipo di interes ta existi den e partidonan.

  • Ta evaluando si ta wanta cu reapertura di frontera cu Merca

    Ta evaluando si ta wanta cu reapertura di frontera cu Merca

    ORANJESTAD – Aruba ta evaluando si ta wanta cu reapertura di frontera cu Merca poni ainda pa dia 10 di juli, of si ta permiti solamente entrada pa Aruba for di cierto parti di Merca. Y esakinan lo ta partinan cu si tin COVID-19 bou di control Asina prome minister Evelyn Wever Croes a bisa diaranson anochi durante e briefing riba COVID-19. Segun e mandatario, e situacion na Merca no ta bayendo manera cu a pensa, cu e por a bay. “Nos ta monitoriando e desaroyonan den diferente estadonan na Merca pa asina nos evalua y tuma un miho decision” Wever a bisa. A bisa cu a dicidi cu no ta bay core riesgo na momento cu habri e frontera. Entre e zonanan ‘for di control’, tin Miami cu ta un gateway pa Aruba, cu tin buelo planea pa dia 10 di juli caba. E buelo aki, awor posiblemente por wordo posponi. 

  • Aruba no tin personanan den cuarentena mas pa COVID-19

    Aruba no tin personanan den cuarentena mas pa COVID-19

    ORANJESTAD – For di diaranson 1 di juli 2020, Aruba no tin ningun hende mas den cuarentena, pa e virus di COVID-19. Asina prome minister Evelyn Wever a confirma diaranson mainta. Mientrastanto Aruba tin 2 caso positivo atrobe, di cual uno ta na cas, y otro ta den hospital. Ambos ta den situacion OK. 

  • Arends: Gobierno actual tabatin poder pa mantene su autonomia financiero

    Arends: Gobierno actual tabatin poder pa mantene su autonomia financiero

    ORANJESTAD – Gobierno di Aruba lo por a para Hulanda di tuma autonomia financiero di Aruba. Asina miembro di fraccion di AVP den parlamento Richard Arends a bisa noticiacla.com diaranson. E ta reacciona asina riba e ponencia di fraccion di e partido geel (MEP) den Parlamento, cu ta AVP ta esun cu a pone Aruba perde su autonomia financiero na 2015. Pa loke ta e dos condicionan cu Hulanda a pone pa Aruba por haya mas placa, e fraccion berde ainda ta wardando informacion y documentonan di Gobierno. 

  • aruba airlines
  • Powered by SETAR