Condicion pa Aruba ricibi proximo fiansa ta hopi mas drastico

ORANJESTAD / DEN HAAG – Hulanda (lesa: Conseho di Minister di Reino) ta dicidi diabierna awor 3 di juli riba e proximo fiansa pa e.o. Aruba y e condicionan cu ta bay mara na dje. Noticiacla.com ta reproduci e articulo aki cu a keda publica recientemente caba, pa re-itera e importancia di e siman aki. E articulo tabata mustra riba e hecho cu ‘mientras cu e ta wardando riba Aruba pa duna su ‘input’ kico e condicionan y/ of medidanan pa e proximo ‘tranche’ di fianza mester bira, Hulanda mes tabata preparando su propio lista di condicion cu Aruba mester cumpli cu ne si e kier haya e siguiente suma di placa como fiansa (tranche)’. For di ministerio di secretario di estado Raymond Knops, Noticiacla.com a compronde mas prome cu e condicionan e biaha aki lo ta mucho mas drastico cu esunan anteriormente impone.   

DEADLINE

Aruba tabatin te dia 15 di juni ultimo pa presenta su propio lista di condicion/medida na e colegio di supervision financiero CAft, cu na su turno lo a duna su recomendacion na Hulanda. Hulanda di su banda, mes tabata preparando pues su lista di medida/condicion. Mientras cu esaki no ta conoci publicamente, noticiacla.com a compronde for di Hulanda cu mester pensa den direccion di e.o. medida cu ta impacta e mercado laboral, reforma di e aparato gubernamental y mas. Tur ta cosnan cu loke IMF, RvA, Banco Central, ARA y CAft mes a bin ta grita pa varios aña caba, pero cu ‘no a wordo haci ainda’ E lo contene reforma grandi’ ta loke e portal aki a compronde for di Hulanda. Hopi di e medida/condicionan como tal, lo no ta cosnan di sorpresa, ni nobo, pero si cu awor no tin salida y cu mester tuma lugar. 

ENTIDAD INDEPENDIENTE

Loke tambe ta interesante ta e entidad independiente di Hulanda cu tin cu bay maneha e fondonan nobo aki cu Aruba ( y otro islanan) lo por haya si e bay di acuerdo cu e medidanan/condicionan nobo drastico aki. A opta pa e biaha aki no pone den man di e respectivo gobiernonan, pero Hulanda mes ta ocupa cu esaki ainda pa dicidi con exacto e structura lo ta y tambe ken tur lo forma parti di e entidad aki. E portal aki a compronde cu na Aruba tin resistencia pa e idea aki, pensando cu ta Aruba mes por maneha esaki. 

ARUBA PREPARANDO

Minister di Finanza Xiomara Maduro a confirma pa e portal aki mas solamente cu Aruba enberdad tabata trahando riba su propio lista di condicion y a presenta esaki mientrastanto na CAft manera palabra y lo haci esaki publico na su debido tempo.