Prominentenan ta apela na Mark Rutte pa compasion pa nos islanan

DEN HAAG – Un grupo di Hulandes ‘prominente’ incluyendo algun artista cu tin vinculo cu islanan ABC, a haci peticion na gobierno Hulandes pa tene compasion cu nos relaciona cu e situacion di crisis di COVID-19. Den un carta dirigi na Prome minister Mark Rutte, nan ta repasa e situacion cu a surgi awor, y con e islanan ta para. Ademas ta repasa e ayudo cu Hulanda a duna, y mas importante, lo sigui duna. De hecho, e apelacion ta mas dirigi riba e siguiente ayudo planea pa keda anuncia diabierna awor durante e ultimo RMR prome cu reces. 

COMPASION Y MENTE FRIEU

“Nos ta pidi bo pa tuma un decision cu compasion y un bon curason di un banda y un mente frieu di otro banda” e carta ta sigui bisa. E compasion ta pasobra mester tene cuenta cu hopi hende riba e islanan ‘no tin nada mas. Nos mester yuda nan’. Pero nan ta sigura cu un mente frieu tambe ta importante. “Condicionan ta necesario, pero laga e islanan pensa hunto, y sigura cu na e proximo eleccionan, tur hende lo sa di balora e solidaridad y derecho di estado di e relacionan di Reino”. Tambe ta pidi pa duna ayudo di tal forma cu e islanan ta experencia e balor agrega di e relacion di Reino y cu di otro banda, ta fortifica e structura economico di e islanan”. E carta aki ta firma pa 15 prominente, entre nan artista, ex politiconan y tambe deportista. Nombernan conoci ta entre otro Jandino Asporaat (cu recientemente a tene un anochi di beneficio pa yuda e islanan), ex politico Ernst Hirsh Ballin (ex minister cu hopi relacion cu nos islanan), Alexander Pechthold (tambe ex minister di Relacionan di Reino), y Churandi Martina (deportista yiu di Corsou). NOTA: E potret ta di archivo di noticiacla durante e ultimo bishita di premier Mark Rutte y secretario di estado Raymond Knops na Aruba. Lesa e carta original https://www.dropbox.com/s/nhc63irqzifwl0f/WhatsApp%20Image%202020-06-28%20at%203.05.29%20PM.jpeg?dl=0AKI.