Oduber: A scohe LABHOH desde principio pa test pasaheronan pa Covid-19

ORANJESTAD - LABHOH a wordo scohi desde un principio pa test pasaheronan pa Covid-19. Asina Gobierno (lesa: Minister Dangui Oduber) a sigura diadomingo anochi den un comunicado. Cu esaki e kier ‘coregi’ e informacion cu a keda publica anteriormente pa un medio di comunicacion (24ora.com) anteriormente. E mandatario ta recorda cu Gobierno a dicidi cu tur pasahero cu yega nos isla lo mester haci un test pa Covid-19. Desde un principio crisis team a scohe LAB HOH pa haci e testnan. E portal en cuestion ta papia di un '3 miyon gate' bou capa di COVID-19. 

GASTO HALTO

E mandatario ta admiti cu na principio Hospital lo no por a cubri e gastonan pa adkiri e mashinnan door di limitacion di cashflow. Segun Oduber, na momento cu hospital a indica cu nan no por financia e mashinan a pidi oferta di 3 laboratorio priva. Pero na final Hospital a indica toch cu nan mes por cumpra e mashinnan y consecuentemente Gobierno lo traha cu LabHOH den esaki manera cu crisis team a dicidi inicialmente. 

Oduber a sigui splica nos cu Gobierno a haya nan den un situacion fastioso pasobra nan mes no tin e fondonan pa adkiri e mashinnan, cu na tur ta costa algun miyon florin. Hospital e ora a considera otronan pa haci dicho inversion. “Pero na final Hospital a dicidi cu nan mes lo haci e inversion pa haya e mashinnan cumpra na Miami y consecuentemente nan mes lo haci e trabou. Den algun ora  e mashin ta produci resultado pa e pasahero”, asina e mandatario a indica. 

El a sigura cu a haci tur esfuerso pa por ta cla pa atende cu pashentnan cu yega Aruba, specialmente for di paisnan cu tin casonan activo. Pero mester tin e aparatonan moderno aki pa no solamente haci test, sino e cantidad pa haci pareu y e rapides pa produci un resultado. 

E mandatario a subraya cu a haci tur esfuerso pa busca alternativanan si en caso Labhoh mes no por a busca e mashinan pa asina por yega na un solucion pa haci e testnan cu tur pasahero. “ Cu esaki gobierno a haya necesario pa corregi e insinuacionan haci, ta lamenta loke a wordo publica y ta spera cu por rectifica esakinan”, refiriendo na publicacionan haci anteriormente, unda cu e portal di noticia en cuestion, (24ora.com) ta referi na un ‘3 miyon gate’ cu por poco lo a sosode, cu intencion di favorece algun persona di saca probecho financiero di un deal. Segun e portal, e crisis team a ‘purba di manipula cu informacion y hechonan pa por a pasa hospital un fastball’. Esaki den hecho cu lo a duna un of mas compania priva e contract pa cumpra e machine miyonario pa haci e testnan di COVID-19.