Pasaheronan di KLM a haci procedura di COVID-19 test na aeropuerto

ORANJESTAD - Diasabra atardi a yega un vuelo humanitario for di Hulanda, cu residentenan di Aruba y studiantenan. Como preparacion pa e proceduranan nobo cu lo drenta na vigor dia 1 di juli proximo, tur e pasaheronan a wordo invita pa boluntariamente test e proceduranan. Prome Minister Evelyn Wever-Croes a duna di conoce cu e test run a bay hopi bon y por conclui cu Aruba ta cla pa re-apertura. E procedura ta inclui e registracion digital a traves di e ED card. Y test di Covid sea prome cu sali of na yegada. 

Un total di 51 persona a wordo getest na aeropuerto di Aruba na yegada, pa personal di Hospital. Nan lo ricibi resultado di e test den 24 ora. 

CUARENTENA

Cada pasahero riba e vuelo aki mester keda den cuarentena te 1 di juli, hasta si e resultado di nan test ta negativo. E motibo ta cu e regla cu pasaheronan no mester bay den cuarentena si e test ta negativo ta drenta na vigor 1 juli.