Compania di Mexico cla pa tuma refineria di Aruba over

MEXICO CITY – E compania Mexicana de Fusiones y Adquisiciones, ta interesa pa bira e operador di e refineria na Aruba. Y esaki nan a laga prome minister di Aruba sa tambe.  Asina e portal mexicano el financiero.com.mx ta raporta. E intencion tabata pa nan traha un refineria na Mexico mes, pa por procesa fuel oil y crudo, pero no ta hayando atencion di gobierno. Mirando esey, a dicidi cu nan ta bay cambia di lugar y move nan plan pa Aruba. Ta trata di un inversion di 900 miyon dollar. “Nos tin e tecnologia y nos tin e inversionista. Pero nos no ta mira mucho futuro akin a Mexico” Guillermo Tapia, presidente di e compania a bisa. E compania ta haya sosten di forza financiero mexicano y dos di China.  

E SITUACION

Manera ta conoci, Aruba ta den proceso pa adkeri un compania interesa pa  tuma e refineria over. Recientemente a publica e documentonan necesario pa documenta e interes oficialmente y ta premira cu pa augustus 2020 lo mester tin un lista di candidato cu lo mester ta interesa pa tuma over. No ta conoci si e compania Mexicano ta parti di e lista ya existente cu e mandatario a bisa cu e tin, of si esaki ta un grupo of compania ‘nobo’ interesa. Den pasado, e compania PEMEX a haci intento tambe pero no a logra.