NoticiaCla.com cumpliendo 6 luna awe informando comunidad di Aruba

Awe NoticiaCla.com ta cumpliendo 6 luna informando comunidad di Aruba y resto di mundo cu noticianan mas relevante disponibel. Un bon momento pa para keto un rato, y reflecciona riba kico tur a sosode durante e 6 lunanan aki. Seis luna despues, e cantidad di bishitante ‘unico’ a surpasa tur expectativa, a nombra e website ‘e website noticioso di aña (power FM 101.7), y a expande pa mas producto. Mientras cu tur esaki ta bunita y un motivacion pa sigui, e no ta e meta principal di nos existencia.

E IDEA

E idea pa lanta un website di basa riba noticia, tabata uno ambicioso, pero sigur segun nos pensamento, un necesidad. Pero no pa ta djis un otro website di noticia, sino uno cu por haci un diferencia y haya un motibo di existencia den e comunidad cybernetico di Aruba y mas alew. Pa por a logra esaki, a percura pa introduci un website cu un structura diferente di tur otro, y cu un formula diferente tambe. A uza 30 aña di experencia, credibilidad adkeri y riba tur cos, basa riba e principio di imparcialidad. Y e resultado tabata www.NoticiaCla.com. For di e comentarionan ricibi for di un inicio, y mas importante, e sistema di ‘track’ e trafico cybernetico, nos por bisa cu (por lo pronto) nos a logra e meta inicial. Inicial, pasobra tin hopi mas pa bin ainda den 2015. Pero e loke NoticiaCla.com a logra den corto tempo, ta haci nos orguyoso y motiva pa sigui brinda mas ainda den e aña(nan) nos dilanti.

RESULTADO

For di e resultadonan incial ricibi, nos a saca afor cu e comunidad a/y ta comprondiendo e ‘formula’ uza di tin menos noticia, pero cu mas contenido, conciso y riba tur cos, responsabel. Calidad riba cantidad. Imparcialidad riba esun partidista. Y manera nos lema ta bisa, ‘noticia cu bo por confia ariba’.

GRADICIMENTO

NoticiaCla.com kier a gradici tur esnan cu for di comienso a kere den dje. Pa cuminsa, nos comerciantenan cu for di comienso a demostra confiansa necesario y e sosten financiero. Nos famia, amigo, coleganan, partnernan cu cual nos a traha e ultimo 6 lunanan, cu for di comienso tambe a mustra nan sosten incondicional. Pero tin algun cu merece mencion special, sin kita sin pone. Na Minister di Telecomunicacion Mike de Meza cu a ‘primi e boton’ pa lansa NoticiaCla.com den aire. Na Amory Tearr pa a bin cu e nomber ‘noticiacla’. Y pa Ruben Garcia su consehonan valioso na inicio di e proyecto. Tin plannan grandi pa 2015, y nos kier ta sigur cu bo ta forma parti di esaki. Corda registra bo email riba nos pagina principal, click subscribe, y keda on informa. Un bon comienso di 2015 y un biaha mas, danki di curason.