Casinonan na Aruba por habri bek diasabra awor pero cu orario limita

ORANJESTAD – Casinonan na Aruba por habri atrobe entrante diasabra proximo. Asina prome minister Evelyn Wever Croes a anuncia diaranson anochi durante e briefing di COVID-19. E mandatario a bisa cu esaki ta en preparacion pa e apertura di frontera entrante 1 di juli cu paisnan manera Canada y Europa. A recorda si cu e ora di ciere lo keda 11’or di anochi por lo pronto. Mes momento a haci un peticion peculiar, dirigi pa e consumo local. E peticion tabata pa nos hendenan local cu ta custumbra y gusta bay casino, no frecuenta esaki mes hopi cu antes, mirando e situacion financiero cu tin aworaki, unda cu hopi hende ta bibando awor di e.o. FASE of subsidio di salario. Loke e mandatario kier men ta cu mester evita cu ta bay usa placa di FASE pa gasta esaki den casino.