Corsou a bolbe impone Toque de Queda diaranson anochi

ORANJESTAD – Corsou ta reactiva su toque de queda entrante diaranson anochi for di 8:30pm pa 6’or am. Asina minister di husticia di Corsou Quincy Girigorie a anuncia diaranson atardi durante un conferencia di prensa. No ta cooci cuanto dia lo mantene e  toque de queda aki. E motibo e biaha aki no ta COVID-19 sino pa establece orden publico debi na disturbionan mas prome den dia. Na inicio di e conferencia a bisa cu esaki lo no ta e caso, pero despues a cambia di pensamento, y a opta pa (mirando con e situacion di manifestantenan tabata desaroya) toch impone e medida drastico aki. Esaki ta pa evita cu disturbionan por sigui toch, despues cu for di atardi esaki a inicia den centro di ciudad di Willemstad. Manera ta conoci, Corsou a conoce un situacion tristo durante parti merdia pa atardi ora cu hendenan a causa destruccion y vandalismo na propiedad, y a te hasta bay asina leu di bolter un auto di polis y cende esaki na candela. Mientras cu manifestacion tabata pa baha gobierno y evita cu tin cu kita 12.5% di trahadonan publico, conforme exigencia di Hulanda, e vandalismo no necesariamente ta di e grupo cu inicialmente a protesta.