Temporada di baseball Grandes Ligas na Merca ta cuminsa otro luna!

NEW YORK – Baseball professional na Merca ta cuminsa un temporada adapta fin di otro luna. Asina e comisionado di Baseball Robert Manfred Jr a bisa e siman aki. Ta trata di probablemente un temporada adapta di 60 wega, cu ta inicia sea dia 23 of 24 di juli proximo. E anuncio a bin despues cu e asosacion di hungadornan a acepta e protocol di seguridad y salud cu lo guia e regreso di MLB relaciona cu e pandemia di COVID-19. Cu esaki, hungadornan lo raporta pa nan campo di entrenamiento entrante 1 di juli proximo. E schedule di wega ta encera grandemente den weganan di division, cu e final hungando e opositornan segun e division geografico, p.e. Oost vs Oost, y West vs West pa limita mas biahe posibel. Mayoria di e ekiponan lo entrena na parkenan di bala den nan propio ciudad. Un temporada normal lo mester a cuminsa for di comienso di april y termina fin di October. Pero awor, esaki ta limita grandemente y ta cuminsa fin di juli, y ta bay pa 60 wega na tur. Esaki ta nifica cu pa fin di September e temporada lo mester ta cla.