ORANJESTAD – E invalnan cu a tuma lugar awe mainta na varios cas y negoshi, no ta parti di e investigacion caso Avestruz sino un caso nobo, cu a haya e nomber “Flamingo’. Asina ministerio publico a confirma diaranson mainta. Durante e invalnan a bishita entre otro cas(nan) di ex minister Otmar Oduber y comerciante R.H. Ademas a bishita un negoshi na Rumbastraat. Tur esaki a keda confirma finalmente pa ministerio publico, cu ta confirma cu ta Landsrecherche (LR) en cooperacion cu RST (Recherche Samenwerkingsteam) y Cuerpo Policial Aruba y bao guia di huez-comisario, a haci e invalnan aki. OM ta confirma cu ta investiga e ‘rol’ di e ex minister den e asunto aki. Esey ta splica e inval na su dos dos casnan.
INVESTIGACION
E huiszoekingnan aki tabata den cuadro di un investigacion penal di Landsrecherche tocante posible delitonan di corupcion y otro hechonan castigable relaciona cu otorgamento di tereno di gobierno. E investigacion penal aki ta carga e nomber codigo ‘Flamingo’.
ORDEN FOR DI SEPTEMBER 2019
Procurador-general a duna Landsrecherche opdracht na september 2019 pa cuminza e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organizacion.
IRREGULARIDAD ENTRE 2017 y 2019
E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019. Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Pa awor no tabatin ningun detencion. Di awor pa dilanti e team investigativo lo analisa e contenido di e administratie y e computernan cu a wordo tuma den beslag, y lo scucha e sospechosonan y testigonan. E investigacion ta den su fase inicial. Ministerio Publico no por bisa ainda si despues lo sigui cu detencion di un of mas sospechoso. Esey ta depende di e resultadonan di e investigacion. Ministerio Publico no kier duna mas informacion na e momento aki tocante e identidad di e sospechosonan y/of di e sospechonan contra nan.
PITTSBURGH - Pa mehora e habilidad riba e crimen cibernetico y fortalese e lasonan cu diferente departamentonan investigativo, commisario di polis Robert Candelario hunto cu diferente coleganan den region a forma parti di e congreso “ Disruption 2024” cu a tuma lugar na Pittsburgh Pennsylvania na Merca.
ORANJESTAD - Ayera durante oranan di merdia Wardacosta a bai cu un boto local na e punto di sosten di Wardacosta pa un control abordo. Durante di e control riba e boto dor di e agentenan di Wardacosta y e K-9 unit di Cuerpo Policial di Aruba, a bin encontra diferente pakete cu droga aden. En total a haya 237 kilo di droga di cual 57 kilo marihuana y 180 kilo cocaina. E droga y e dos hombernan, di cual unu local y unu Venezolano a keda entrega na Cuerpo Policial di Aruba.
ORANJESTAD – Diasabra atardi, Aruba a conoce su di 3 morto di trafico pa 2024. Segun informe oficial di polis, awe despues di 4’or atardi Central di Polis a dirigi patruya di Noord, ambulance y cu maximo urgencia pa un accidente pisa na altura di e supermercado NG y e restaurant Yen Yen situa na Kamay. Na yegada di e prome unidad a mira dos auto involucra den e accident. Un auto marca Nissan, modelo almera color shinishi numera A-24490 y un Honda, modelo CRV, color cora numera A-52927.
ORANJESTAD - Den ora nan di atardi, Centro Operacional Maritimo (MOC) di Wardacosta, a ricibi un mensahe pidiendo asistencia medico. Ta trata di un pasahero Aleman di 66 aña di edad riba un barco crucero, biniendo for di dirección nort di Aruba. Inmediatamente a tuma contacto cu doctor na warda di CITRO, cu a constata (despues di a evalua e situacion cu e team di medico riba barco) cu ta trata di un atake (stroke). Inmediatamente a manda e helicopter pa evacua e persona. Miembro nan di ambulance a ricibi e pasahero na Queen Beatrix International Airport i a hiba e turista hospital, pa ricibi tratamento medico.
ORANJESTAD - Wardacosta ta informa doñonan di boto y seadoo pa tene cuenta pa nan tin nan documentonan valido a bordo cual ta, ‘vaarvergunning’ y ‘vaarbewijs’ di e capitán. Zorg pa tin vest di salbabida pa tur tripulacion y pasahero abordo; no por bai ku dimas pasahero abordo di e boto pa evita situacion peligroso.