Hopi dentista preocupa cu cortamento di gasto di AZV lo afecta grupo grandi di cliente

ORANJESTAD – E asosacion  di dentista na Aruba ta hopi preocupa cu e plannan di ‘corta gasto’ di AZV, y con e lo afecta e forma di traha pa nan. Asina noticiacla.com por a compronde di varios dentista na Aruba. Nan mes lo bin cu puntonan specifico pronto, pero pa awor, a compronde cu e ideanan cu AZV tin pa cu cortamento di gasto, lo tin efecto serio riba por lo menos 40 pa 50% di nan clientenan. Esaki pasobra e grupo aki ta cay bou di AZV y ta haya e servicio di dentista cubri. Y a compronde cu e plan ta, segun cu e dentistanan a compronde, pa kita cierto servicio completo cu awor ta wordo cubri pa AZV. Ranca djente, beugel, y mas, tur awor lo bin cay pa cuenta di e pashent mes. Y e dentistanan tin miedo cu esaki ta nifica cu hopi no por ‘afford’ dentista, cu consecuencia cu hopi persona lo haya problema cu nan djente, y na final, lo costa AZV aun mas placa.