Plan nacional pa atende cu e problematica di cacho na Aruba (Parti 1)

ORANJESTAD - Manera a wordo publica na mas cu un ocacion, ta un echo cu na Aruba tin demasiado cacho riba caya. Pero e echo mes ta, cu na Aruba nos tin demasiado doño cu no ta atende debidamente cu nan mascotanan. 

Enbes di papia di e problematica di ‘kill cage’ of e problematica di e ley di cacho, of di cachonan riba caya y e tantisimo cachonan cu auto ta dal, ban papia di e problema real, cual ta e doño iresponsabel. 

NGO’s cu ya pa añanan ta atendiendo cu e problematica aki, ta inverti nan tempo y esfuerso den campañanan di conscientisacion, sterilisacion y adopcion. 

Gobierno a inverti semper den eutanasia di e bestianan indesea y tambe, ora por, den campañanan di conscientisacion. E efecto di tur locual Gobierno y NGO’s a yega di haci ta mustra cu e efecto ta uno temporario. E cantidad di cacho y pushinan cu Servicio Veterinario ta pone drumi pa aña ta baha un temporada cortico, pero despues, e cantidad ta bolbe subi. E efecto di tur esfuerso di Gobierno y NGO’s mester ta uno duradero. P’esei un Plan Nacional cu ta atende cu e problematica di cacho riba caya, incluyendo e killcage y e Ley di Cacho. 

E metanan di e Plan Nacional ta pa: 

1.      stimula doñonan pa ta mas responsabel cu nan mascotanan;

2.      mehora e salud y bienestar di cachonan cu tin doño y tambe di esunnan sin doño;

3.      reduci e cantidad di cachonan cu ta riba caya; y 

4.      preveni importacion y negoshi ilegal di cachonan.

E plan ta uno cu ta rekeri atencion multidisciplinario for di diferente ministerio, tambe di diferente NGO’s y varios stakeholders. E plan ta partí den accionnan cu tin di tuma luga inmediatamente y accionnan den corto y largo plaso. E plan aki cu a wordo aproba door di henter e Conseho di Minister na juni 2019, porfin lo cuminsa wordo ehecuta. Lo ta e prome biaha cu Gobierno huntu cu NGO’s ta bay atende ampliamente cu e problematica aki, pa asina hunto yega na un solucion duradero pa e problema. 

Lesa mas den e siguiente seccionnan di informacion tocante e Plan Nacional aki.