Mester warda riba Hulanda toch pa posibel solucion 'intermediario'

ORANJESTAD - Despues di dos ora di negosacion entre ministernan di gabinete Mike Eman II y gobernador, partidonan no a yega na otro diamars anochi pa un solucion pa termina e welga di hamber di premier Eman. Na final di e anochi, minister Mike de Meza a hiba palabra indicando cu ta gobierno di Aruba a haci e intento y asercamiento pa por tin un posibel solucion pa tanto firmamento di e presupuesto, como fin na e welga di hamber di su colega Eman. Pero no por a keda cla ya cu loke cu gobernador mester, no por tuma lugar sin aprobacion di Hulanda. Como tal mester warda diaranson yega, pa haya reaccion di gobernantenan hulandes, prome cu por sali for di e asunto aki. Inicialmente a kere cu den cuestion di horas, por a sali afo, pero esey no a resulta e caso. Notable tambe diamars anochi tabata momento cu gobernador a bandona su despacho, cu cantidad di hende na e sitio a cuminsa grita gobernador pa traidor y otro palabranan menos netchi, mustrando nan disgusto pa cu su actuacion ultimo dianan. Pues ta keda pendiente pa diaranson mainta pa tende si e loke cu a keda proponi na gobernador, ta keda aproba pa Hulanda pa por sali for di e impasse aki. Por lo menos parti di dje, unda cu premier Eman lo por para su welga di hamber.