Aruba diamars atrobe a sigui cubri pa e stof di Sahara

ORANJESTAD – Mientras cu a kere y spera cu dialuna lo tabata e dia pio di e stof di Sahara pa Aruba, ta parce cu diamars Aruba a lanta pio, cubri mas ainda bou di e capa di stof. Hopi tabata e comentarionan cu diamars, e efecto tabata 'pio' cu dialuna. Mientrastanto tanto Corsou y Bonaire a raporta kehonan di salud debi na e stof aki. For di ayera, e situacion historico aki (pa loke ta e cantidad grandi di stof pero no e situacion mes) a capta atencion di tur hende, mas cu normal. Den pasado caba tin varios biaha cu ta alerta pa e situacion aki. Pero casi ningun hende no ta ripara esaki. E biaha aki sinembargo, el a bira noticia internacional y hopi a dicidi di documenta esaki. Ayera caba noticiacla.com a comparti potretnan di Ayrton Tromp di ARTN Photography. Awe mainta atrobe Ayrton tabata tempran y a documenta e ‘salida’ di solo’, cubri bou di e capa di Sahara.