Koopmans: Serlimar lo paga vakantieuitkering riba un otro fecha

ORANJESTAD – Trahadonan di Serlimar Sui Generis lo haya nan pago di vakantie uitkering riba un otro fecha envez di aworaki. Asina director di e compania Anko Koopmans a bisa noticiacla.com diamars atardi, riba e situacion cu a surgi ora cu trahadonan a haya nan salario, pero sin vakantie uitkering. Mesora a cuminsa surgi un trafico riba rednan social, di disgusto pasobra no lo a haya e placa completo. 

OTRO DEBE

Koopmans ta bisa cu riba ordo di e bewindvoerder (e persona encarga awor cu e compania su maneho debi cu e ta bou di un surseance van betaling te augustus 2020) a bisa cu tin otro debe pa paga tambe, y cu awor por paga salario so. “Esey no kier men cu e no ta bay wordo paga” Koopmans a sigui bisa. No tin fecha pa e pago di e vakantie uitkering wordo paga. 

SITUACION FINANCIERO

Koopmans a splica cu enberdad den juni normalmente, ta haci pago di vakantie uitkering. Y for di dia 22 mester a paga salario. Pero esaki a sosode awe, unda cu den un carta, a notifica trahadonan di e situacion. E carta ta bisa cu aworaki lo no paga e vakantie uitkering debi na e situacion financiero precario. Ademas , Serlimar no a ricibi pago ainda pendiente di gobierno. Mientras cu e placa cu gobierno debe Serlimar no tabatey, Koopmans a bisa, e mester a haci esaki awor. Ta depende con e cen drenta, cu lo por paga e vakantie uitkering riba un otro fecha.