- Den e proximo simannan seguro di cas lo ta central na ENNIA
- DIMP: Ta otorga declaracion di winstbelasting 2023 den forma digital
- Apelacion caso Avestruz ta inicia otro siman cu scuchamento di testigo
- RAIZ : E harmonia di nos comunidad ta den man di Parlamento diaranson
- Gasoline ta bolbe subi diaranson, aunke no hopi
Debi na COVID-19, AVB a cancela campeonato di futbol 2019-2020
ORANJESTAD - Debi na COVID-19, AVB a cancela campeonato di futbol 2019-2020. Asina e federacion ta anuncia pa medio di un comunicado. Desde 13 di maart debi na e crisis cu a presenta door di e virus Covid-19, AVB a hañ’e obliga di pospone tur actividad (wega) relaciona cu su campeonato 2019-2020. Pa motibo cu no tin claridad di kico e crisis aki lo nifica pa futbol di Aruba, AVB tabata den contacto constantemente cu FIFA, Concacaf y tur e instancianan concerni na Aruba pa asina por maneha e situacion lo miho posibel.
Di e forma aki AVB a traha riba diferente scenario en caso Gobierno permiti pa habri pa deportenan di contacto y eventonan publico. A base di esaki, AVB a traha scenarionan en caso Gobierno permiti pa habri 15 di mei, 1 di juni of 15 di juni 2020. For di e scenarionan menciona, por deduci, cu si Gobierno permiti pa habri despues di e fecha di 15 di juni, esaki lo ta devastador pa campeonato 2020-2021 y futbol den su totalidad.
A base di esaki, AVB a yama un reunion den luna di mei 2020 cu tur club miembro y a presenta tur e scenarionan y nan consecuencianan. Den dicho reunion a palabra cu tur e dirigentenan, cu na momento cu Gobierno no permiti pa habri pa deportenan di contacto prome cu 15 di juni, lo yama un reunion general extraordinario pa tuma un decision si ta cancela of ta continua cu e campeonato 2019-2020.
Despues cu AVB a constata cu pa 15 di juni Gobierno lo no permiti pa habri, manera palabra a dicidi di convoca un reunion extraordinario dia 17 juni 2020. Durante e reunion aki, AVB a duna un splicacion di su proposicion, cu tin como meta pa cuida interes y salud di tur esunnan cu ta envolvi den futbol, di dirigente, coach, hungado, lider, fanaticonan y specialmente e hungadonan den division infantil y hubenil.
Por ehempel AVB a splica cu si Gobierno permiti pa habri pa deportenan di contacto 1 di juli proximo, esey lo nifica cu campeonato lo no por continua prome cu 15 di augustus. Conforme e exigencianan di WHO y FIFA, e hungadonan, cu a keda 3 luna inactivo, mester haya un periodo di por lo menos 6 siman pa por yega na un nivel competitivo.
Debi na esaki, e campeonato 2019-2020 lo termina na luna di december 2020 y cu consecuencia cu e siguiente campeonato 2020-2021 lo inicia den luna di maart 2021. Manera ta conoci den luna di januari ta tuma luga e torneo Copa Betico Croes y tambe mester tene cuenta cu e periodo di carnaval.
Na momento cu continua cu e campeonato di e divisionnan infantil (U-5, U-7, U-9, U-11 y U-13) y hubenil (U-15, U-17 y U-20) dia 15 di augustus 2020, nan campeonato lo termina na fin di september 2020. Consecuentemente e categorianan infantil y hubenil lo mester warda 6 luna pa por participa na e campeonato nobo 2020-2021. Pues ta diferente factornan y consecuencianan directiva di AVB mester a analisa y evalua prome cu el a yega na su proposicion basa riba e hecho cu ainda no tin un fecha exacto ki dia e campeonato 2019-2020 lo por continua pa por finalisa. Tampoco ta completamente cla den ki formato lo continua cu e campeonato, mirando cambionan cu mester introduci.
Despues cu directiva a duna un splicacion di su proposicion, e representantenan di e clubnan miembro di AVB presente mester a vota si ta cancela of ta continua e campeonato 2019-2020. En total 38 dirigente por a haci uzo di nan derecho di voto, cu a duna como resultado cu 21 a vota na fabor pa cancela y 17 a vota pa continua cu e campeonato. Pues e clubnan a dicidi di cancela campeonato di futbol 2019-2020. Cu e resultado aki, AVB lo tin espacio awo pa inicia e proceso pa organisa e campeonato 2020-2021 na september proximo, si Gobierno permiti esaki.
Importante den e proceso aki ta cu mester tene na consideracion cu den deporte tambe conoce “E normal nobo” awo cu ta inclui varios cambio y adaptacionnan den forma di organisa wega, programa di entrenamiento y participacion di fanaticonan durante cada encuentro deportivo. Te ainda no ta cla y no tin un fecha pa cuminsa tampoco. E reglanan nobo no ta un invento di AVB, sino a bin di World Health Organisation (WHO). Nan a introduci condicionnan con pa practica deporte, dependiendo con grandi of chikito e riesgonan ta.
Alabes mester considera, cu apesar cu no tin casonan activo di Covid-19 na Aruba, lo no por bay bek na e custumbernan bieu. Henter e manera, e custumber con ta practica deporte, tin cu cambia, tambe na nivel di club. Tin cu educa e clubnan, tin cu splica, tin cu guia con esey mester bay awo.
AVB tin e tarea pa splica clubnan kico mester haci pa combati e contagio a base di protocolnan existente y esaki lo tuma tempo pa splica pakico e ta importante. Tanten cu e clubnan y esunnan envolvi den futbol, no cumpli cu e protocolnan general y di siguridad necesario pa limita e riesgonan di Covid-19, no lo permiti pa habri pa deportenan di contacto y eventonan publico.
Lo ta habriendo frontera pa Europa, Canada y Merca, kiermen e virus lo bin bek y si no ta prepara, e lo tin su consecuencianan un biaha mas. P’esey e meta principal ta p’e no afecta mundo deportivo. Pa directiva di AVB, salud di cada un persona envolvi den futbol na Aruba mester prevalece riba tur otro interes.
VIDEO: Antersijn ta conta di highlight di su carera profesional como keeper
ORANJESTAD – E keeper internacional, e Arubiano Jean Marc Antersijn ta considera e yamada di Patrick Kluivert (otro futbolista internacional renombra) pa e hunga pa e seleccion di Corsou como un di su momentonan mas grandi di su carera. Durante e programa Noticiacla LIVE diahuebs anochi, e la comparti cu periodista y moderador Tito Laclé, e momento aki cu e la experencia algun aña atras. Pa wak e programa completo, click AKI.
Tres coredo di Aruba ta riba e Wall of Fame mundial di marathon, cu Lana Gobert como e unico femenino
ORANJESTAD – Cu e ultimo prestacion di e conocido coredor di Aruba Lana Gobert na e Tokio Marathon, e cantidad di Arubiano riba a muraya mundial di fama di Marathon mundial ta aumenta na 3. E otro dosnan ta e conocido Michel la Haye y Wilfredo Ras. E siman aki Gobert a comparti e logro aki riba us pagina, cu awor su nomber tambe ta aparece entre e grandinan cu a participa na tur e 6 marathonan mundial conoci cu ta e marathonnan di New York, Boston , Berlin, Chicago, London y Tokyo. E aña aki Gobert a logra e ultimo marathon aki pa completa e circulo di 6 marathon mayor. Hunto cu esaki, e ta bira e prome coredor femenino representando Aruba den e asina yama Abbott Major Marathon 6 star series!
Aruba ta co-anfitrion di Torneo futbol Damas U15 Concacaf cu Trinidad y Costa Rica
MIAMI/ ORANJESTAD – Pa prome biaha den historia, Aruba ta co-anfitrion di e torneo Damas U15 di Concacaf. Asina a keda anuncia na Miami diahuebs ultimo. E weganan lo tuma lugar entre 5 y 11 di augustus 2024. Aruba lo ta anfitrion di e liga C, Trinidad Liga B y Costa Rica A. Un total di 35 pais miembro a informa cu nan ta interesa pa participa den e weganan aki. Tur tres liga lo inclui un parti di grupo y un parti di knockout y corona su campeon. E cantidad di ekipo pa liga lo keda deterina basa riba e ranking di Concacaf Woman’s U-17 Ranking di maart 2024 y e number final di participante.
Inter ta titula campeon di Italia pa di 20 biaha ganando di AC Milan
MILAN – E ekipo di futbol professional Italiano Inter a gana su di 20 titulo di campeon di Italia, despues di a gana e final contra AC Milan dialuna atardi cu score di 2-1. Denzel Dumfries, e orguyo di Aruba a drenta den 7 minuut prome cu final di e partido , pero a keda expulsa algun minuut despues cu carchi cora na final pa un bringamento cu un hungador di AC Milan Hernandez cu a provok’e. Un asunto cu tabata canando caba. Cu e victoria aki, inter por pone un di dos strea riba nan uniform den e proximo temporada. AC Milan tin uno.
Ekipo di Denzel Dumfries (Inter) ta hunga contra Milan pa e titulo di Italia awe
MILAN – E ekiponan rival Italiano AC Milan y Internazionale ta topa otro pa e titulo nacional. Interesante pa Aruba ta cu e ‘Arubiano’ Denzel Dumfries ta figura den e hungadornan pa e seleccion di Inter. E ekiponan ta rivalnan grandi di otro. Mientras cu Inter ta e faborito, 46% chens pa gana epartido, un victoria no ta sin mas. Milan lo haci tur cos pa daña e ‘fiesta’ di Inter. E hecho cu Inter a gana Milan 5-1 tempran den e temporada aki, no ta nifica nada pa e wega di awe nochi, segun comentarista italiano di futbol. E wega ta cuminsa pa 2:45pm ora di Aruba.
MLB impresiona cu catcher di Aruba pa Atlanta Braves Chadwick Tromp
ATLANTA — E pelotero professional di Aruba Chadwick Tromp ta hayando mencion tras di mencion pa su prestacion actualmente den e ekipo di Atlanta Bravez. E siman aki tabatin un otro raportahe riba su prestacion, unda cu varios punto di Tromp ta resalta. Entre nan, su abilidad pa conecta cu pitchernan di su ekipo, e determinacion pa traha duro, e disciplina y su forma di ta. Y e prestacion actual pa e temporada aki unda cu e la habri 6 wega caba como e catcher principal pa e ekipo, ta wordo considera como remarkable.
Follow NoticiaCla
