Sinterklaas lo bin Aruba e aña aki sin pietnan 'color scur'

ORANJESTAD – Contrario na Corsou, e homber Santo (Sinterklaas) lo yega Aruba e aña aki, pero e diferencia ta cu e lo yega den un forma diferente. E potret cu ta acompaña e articulo, ta di aña pasa y lo no ripiti e aña aki. Asina minister di Cultura Xiomara Maduro a bisa noticiacla.com dialuna durante un conferencia di prensa. Mester wak con ta haci cu e ‘aglomeracion’ di hende relaciona cu e crisis di COVID-19. Esey ta haci e yegada un reto, pero no ta asina cu ta cancela e yegada, manera cu a haci na Corsou. Aunke mester bisa cu e cancelacion na Corsou ta debi na situacion financiero. 

CAMBIA E ‘LOOK’ DI PIET

Segun Maduro, loke ta bay cambia e aña aki, ta e ‘look’ di e pietnan. Esaki pa evita mas problema di controversia rond di e asunto di e.o. rasismo. Mester bay cu tempo y mester percura pa tur hende ta ok cu esaki. No por complace tur hende pero no por elimina e tradicion aki full tampoco. Como tal a sugeri pa e aña aki, percura pa e pietnan, no ta ‘zwart’ pinta, sino di color, of simplemente laga e cara ta di e color natural di cuero. 

TEMA DELICADO

E forma con e mandatario a repasa henter e historia y a usa su palabranan hopi ‘cuidadoso’ ta duna indicacion cu gobierno ta na altura cu e la bira un tema hopi ‘sensitivo’ y no kier lanta mas stof cu ta necesario. Den un forma detaya, y porta hopi largo, e mandatario a purba splica kico e dolornan por ta den comunidad y cu no mester alimenta esaki pa crea aun mas problema. Cu esaki, e mandatario ta sugeri pa e cambionnan. Pero mes momento a splica e portal aki, cu mientras cu ta sugeri e cambionan di zwarte piet, no ta asina cu si no cumpli cu e cambionan, cu lo no duna permiso pa e evento(nan) tuma lugar. Esaki pasobra e permiso ta wordo duna a base di orden publico, y no a base di color di e pietnan.