Tur bishitante pa nos isla mester seguro di COVID-19 di Aruba pa drenta

ORANJESTAD – Ora cu frontera habri otro siman pa Europa y Canada, y despues pa Merca, lo bira obligatorio pa pasaheronan turista (no residente) cumpra seguro di COVID-19. Esaki, segun minister Dangui Oduber, no obstante e hecho cu un pasahero tin seguro pa COVID-19 caba. Oduber a splica noticiacla.com dialuna mainta durante un conferencia di prensa, cu aunke cu nan tin seguro, esaki no ta cubri e periodo di isolacion/cuarentena cu ta rekeri ora cu e persona aki tin simptoma y of keda getest positivo pa COVID. E tratamento ta cubri, pero no e cuarentena. Como tal, no ta importa si e persona tin seguro caba of no. Mes momento si, e mandatario a bisa cu e intencion ta pa despues di 2 luna, lo mester evalua e situacion y wak si ta necesario pa revisa e regla aki. Esaki por nifica cu ta amplia of elimina cierto regla cu lo ta na vigor pa loke ta seguro. Asina e mandatario a sigura e portal aki.