No tin claridad ainda pa biaheronan cu tin seguro caba di COVI-19 cu kier bin Aruba

ORANJESTAD – Ainda no tin claridad riba e asunto di seguro obligatorio pa biaheronan cu bin Aruba entrante 1 di juli proximo. Asina por a compronde di miembro di crisis team Sharline Koolman durante e ultimo briefing diabierna. Segun Koolman, ‘ta finalisando e partinan aki’. “Si un persona tin un seguro caba, mester warda si e seguro aki ta cubri COVID” Koolman a bisa. E ta un pregunta cu hopi biahero international ta haciendo y a raiz di esaki noticiacla.com a haci e pregunta.

PROBLEMA

Segun Koolman, esey ta e problema di mas grandi, cu si cada biahero ta bay manda nan polisa di seguro pa check, dificilmente bo tin personal pa bo sinta controla esakinan. A bisa cu a introduci esaki pa simplemente tin e siguransa cu e parti aki ta wordo cubri. “Y tambe eigenlijk pa nos no haya nos cu personanan na Aruba cu na cierto momento no tin e seguro aki, y entre otro mester wordo opgenomen den hospital, e no por paga e cuentanan aki” Koolman a sigui bisa. Pues no por a duna un contesta concreto, pasobra no a keda cla riba e tema aki.

SEGURO COVID

Manera ta conoci, Aruba a anuncia cu ta obliga tur biahero no residente pa cera un seguro pa COVID-19, prome cu nan biaha. Pero a surgi e pregunta kico ta haci cu esnan cu ya caba tin un seguro asina. Inicialmente a pensa cu no tin seguro di COVID. Pero awor parce ta resulta cu esaki si ta e caso. Pues cu na tanto Europa como Merca, tin companianan cu ta ofrece e seguro aki y cu por haya nan mes ta paga seguro doble, mas caro, pa por bin vacacion na Aruba.