KLM a baha pasahero di avion pa Aruba cu no kier a bisti mondkapje

AMSTERDAM - E buelo KL 783 di KLM cu a yega Aruba for di Amsterdam diasabra atardi, tabatin retraso debi cu un pasahero no kier a bisti su mondkapje. Despues cu autoridad a baha e pasahero di e avion, e buelo por a lanta. Otro detaye interesante tabata e hecho cu debi cu tabatin 'apenas' entre 60 pa 80 pasahero abordo (mayoria studiante y residente di Aruba), a pone nan tur sinta meimei di e avion pa motibo di e proceso di 'weight & balance' di e avion. Despues cu e avion a lanta, a plama e pasaheronan riba henter e avion. Manera regla, tur pasahero tabata obliga pa bisti mondkapje durante henter buelo. Pa loke ta e pasahero cu no kier a bisti mondkapje, no ta prome biaha cu esaki ta sosode. El a sosode recientemente caba cu KLM den siman cu a pasa y tambe cu un buelo di American Airlines ora cu e avion mester a bolbe gate bek pa baha e pasahero desobediente . E pasaheronan cu a yega Aruba awe, segun regla, mester bay den cuarentena obligatorio te dia 1 di juli proximo, cu ta e ultimo dia cu pasaheronan cu yega Aruba, mester bay den cuarentena.