HOH: Ora caba test pa asbest, lo cuminsa habri servicio bek

ORANJESTAD – Hospital Horacio Oduber Hospital a informa diabierna atardi cu ainda no ta cla pa habri cierto departamentonan, debi cu falta resultado di algun test pa asbest. Mientras cu varios area a sali negativo, e area di e cancela cu a surgi diamars, a sali positivo. Pues e area ey ainda no por habri. Y hunto cu ne varios otro departamento. 

E CANDELA

Manera ta conoci, diamars atardi a surgi un candela na e edificio dilanti na Hospital unda construccion ta tumando luga. Manera anuncia previamente a logra contene e candela na tempo y a logra evacua y zorg pa tur pashent y empleado ta safe. Desafortunadamente a resulta cu tin asbest. Siguridad di pashent, bishitante y empleado ta primordial pues esaki ta un motibo principal pa no habri algun area y departamento. 

INCERTIDUMBRE

Hospital ta compronde cu tin incertidumbre y ta p’esey lo test profundamente.  No solamente a start e procedura di asbest y ta midi e calidad di aire, tambe lo haci investigacion di fibranan di asbest cu por a scapa door di candela. E compania Douhsar NV cual ta specialisa riba e tereno aki ta encarga cu esaki.

VARIOS TEST

Ya caba a haci 2 test na departamento di Emergencia; tur dos cu resultado negativo. Tambe a haci test na otro departamentonan manera Revalidatie, Radiologia, Lab, departamento di Mucha, Endoscopia y Botica cu tambe a sali negativo pa asbest. Testnan riba otro departamentonan ainda ta andando. E departamentonan unda cu e asbest ta negativo lo pasa door di un limpieza profundo prome cu nan por bira operacional bek.  Pues pronto nos departamento di Emergencia lo ta completamente bek den servicio. 

AREA A

Lamentablemente, e testnan cu a wordo haci na Area A, e area di construccion unda e candela a surgi, no a sali negativo. Pa e motibo aki no por habri esaki te proximo aviso. Ta trahando duro pa inventarisa e asbest y e saneamiento di esaki.